ژمارەی قوربانیانی جەنگی ئیسرائیل و ئێران بۆ سێ هەزار كەس بەرزدەبێتەوە

AFP

دووکەڵ لە نەخۆشخانەی سوروکا لەشاری تەلئەبیب بەرزدەبێتەوە

ئیسرائیل و ئێران ماوەی حەوت رۆژە لە جەنگدان و بەردەوامیش هێرشی مووشەكی دەكەنە سەر یەكتر و قوربانیانی جەنگەكەش لەو ماوەیەدا بۆ نزیكەی سێ هەزار كوژراو و بریندار بەرزبووەتەوە.

بەپێی ئامارێكی رێكخراوی چالاكوانانی مافی مرۆڤ لە ئەمریكا: "زیاتر لە 639 كەس لە ئێران بەهۆی هێرشەكانی ئیسرائیلەوە كوژراون".

دەربارەی ژمارەی بریندارەكانیش، رێكخراوەكە ئاشكرای كردووە: "تاوەكو ئەمڕۆ 19ی6ی2025، هەزار و 329 كەس بەهۆی هێرشی ئاسمانی ئیسرائیلەوە برینداربوون".

لەلایەكی دیكەوە، كەناڵی 12ی ئیسرائیل بڵاویكردەوە: "لە هێرشەكانی ئێران بۆ سەر شارەكانی ئیسرائیل 24 كەس كوژراون و 838 كەسی دیكەش بریندار بوون، هەروەها نزیكەی پێنج هەزار هاووڵاتیش لە ماڵەكانیان بۆ شوێنێكی دیكە گوازراونەتەوە".

كەناڵە ئیسرائیلییەكە ئاماژەی بەوەشكردووە: "ئێران زیاتر لە 400 مووشەكی ئاڕاستەی ئیسرائیل كردووە، لەو ژمارەیەش 40 مووشەكیان كەوتوونەتە ناوچە جیاوازەكانی ئیسرائیل".

پەیوەست بە ئاماری برینداری ئەمڕۆش، كەناڵی 12 رایگەیاندووە: "لانیكەم لە ئەنجامی هێرشەكەی ئەم بەیانییەی ئێراندا 271 كەس برینداربوون و 4 كەسیشیان برینەكەیان سەختە".

بەرەبەیانی رۆژی 13ی6ی2025، ئیسرائیل هێرشی كردە سەر چەند بنكەیەكی ئەتۆمی و سەربازی لە ئێران و بەهۆیەوە ژمارەیەك فەرماندەی سەربازی و زانای ئەتۆمی كوژران، لە وەڵامیشدا ئێران هێرشی مووشەكی كردە سەر تەلئەبیبی پایتەخت و شارەكانی دیكەی ئیسرائیل. 

PUKMEDIA