جەنگی ئیسرائیل و ئێران بۆ شەشەمین رۆژ بەردەوامە

AP Photo/Morteza Zangene/ISNA

تاران

ئاڵۆزییەکانی نێوان ئیسرائیل و ئێران بۆ شەشەمین رۆژی بەردەوامە، هێرشی ئاسمانیی و مووشەکیی بەرچاو لەیەن هەردوولاوە راگەیاندراوە و دۆخەکەش نیگەرانییەکی بەرفراوانی نێودەوڵەتی لێکەوتووەتەوە.

دوژمنایەتی چڕتر

هێزەکانی ئیسرائیل زنجیرەیەک هێرشی ئاسمانییان بۆسەر ژێرخانی سەربازی ئێران ئەنجامداوە و بەپێی زانیارییەکان دامەزراوە ئەتۆمییەکان و سیستەمی مووشەکی و شوێنەکانی بەرگری ئاسمانی لە نزیک تاران و ناوچە ستراتیژییەکانی دیکەیان کردووەتە ئامانج.

لە بەرامبەردا ئێران مووشەکی بالیستی و هایپەرسۆنیک و هەروەها هێرشی درۆنی کردە سەر شارە گەورەکانی ئیسرائیل و کردنیە ئامانج لەوانە تەلئەبیب و حەیفا و بیعرشێڤا.

لە کاتێکدا زۆرێک لە موشەکەکان لەلایەن سیستەمی بەرگری ئاسمانیی ئیسرائیلەوە رێگرییان لێکرا، بەڵام هیرشەکە چەندین لێدان و زیانی گیانی لێکەوتووەتەوە، هاوکات فریاگوزارییەکان بوونی دەیان برینداریان راگەیاندووە.

هەڵوێستی ئەمریکا و بەیاننامەی ترەمپ

ویلایەتە یەکگرتووەکانی ئەمریکا چەندین کەرەستەی سەربازیی لەڕۆژهەڵاتی ناوەڕاست جێگیر کردووە، لەوانە فڕۆکەی بۆمبڕێژکراو و فڕۆکەی سووتەمەنی ئاسمانی، ئەمەش لە کاتێکدا بەرپرسان بەڕێکارێکی خۆپارێزی بۆ پاراستنی بەرژەوەندیی هاوپەیمانیی وەسفی دەکەن.

بەپێی زانیارییەکان، هێزە ئەمریکییەکان رێگرییان لەچەند مووشەک و درۆنی ئێران بۆ سەر ئیسرائیل کردووە.

دۆناڵد ترەمپ سەرۆکی ویلایەتە یەکگرتووەکانی ئەمریکا هۆشدارییەکی توندی ئاراستەی ئایەتوڵڵا عەلی خامنەیی رێبەری باڵای ئێران کرد و بە "ئامانجێکی ئاسان" ناوی برد و ڕایگەیاند: سەبر و خۆڕاگری ئەمریکا "کەمبووەتەوە".

لە پۆستێکدا لە تۆڕی کۆمەڵایەتی ترو سۆشیاڵ، ترەمپ رایگەیاند: ئەمریکا بەوردی شوێنی خامنەیی دەزانێت، بەڵام " لەناوینابەین - لانیکەم بۆ ئێستا نا."

هەروەها داوای "تەسلیمبوونی بێ مەرج"ی ئێرانی کرد و جەختی لەوە کردەوە کە هێزەکانی ئەمریکا و ئیسرائیل "کۆنترۆڵی تەواوی ئاسمانییان بەسەر ئێراندا هەیە".

لە کاتێکدا ئەم لێدوانانە بەشێکن لە لێدوانە رەسمییەکانی سەرۆک کۆمار، بەڵام کۆشکی سپی روونکردنەوەی زیاتری نەداوە، ئەمەش سەرنجی جیهانی راکێشاوە و نیگەرانییەکان  بۆ بەرزبوونەوەی زیاتری گرژییەکانی ناوچەکە زیادیکردووە.

کاردانەوە نێودەوڵەتییەکان

نەتەوەیەکگرتووەکان و یەکێتی ئەوروپا و چەند حکومەتێکی رۆژهەڵاتی ناوەڕاست داوای ئاگربەستیان کردووە.

رێکخراوە مرۆییەکانیش نیگەرانی خۆیان لە مەترسییەکانی سەر ژیانی خەڵکی مەدەنی و ئەگەری دروستبوونی قەیرانی مرۆیی فراوانتر دەربڕیوە.

هاوکات شرۆڤەکاران هۆشداری دەدەن لەوەی ئەگەر هیچ چارەسەرێکی دیپلۆماسی نەدۆزرێتەوە، ئەگەری هەیە شەڕ و پێکدادانەکان زیاتر پەرەبسێنن.

لە ئێستاشدا بۆ کەمکردنەوەی پەرەسەندنی ئاڵۆزییەکان هەوڵەکان لە پشت پەردەوە بەردەوامن.

PUKMEDIA