هێرشە مووشەكییەكەی ئێران بۆ سەر ئیسرائیل 10 كوژراوی لێكەوتەوە

فرانس پرێس

ئیسرائیل لەدوای هێرشە رۆکێتیيەکانی ئێران

بەهۆی هێرشە مووشەكییەكەی دوێنێ شەوی ئێران بۆ سەر ئیسرائیل، 10 كەسی كوژراون كە منداڵ و بەتەمەنیان تێدایە، هاوكات حەوت كەسی دیكەش بێسەر و شوێنن.

ئەمڕۆ یەك شەممە 15-6-2025، پۆلیسی ئیسرائیل، ژمارەی كوژراوانی بەهۆی هێرشە مووشەكییەكەی دوێنێ شەوی ئێران بۆ سەر وڵاتەكەی ئاشكرا كرد و رایگەیاند: " 10 كەس كوژراون كە 6 كوژراویان لە شاری باتیام-ن و دووانیان منداڵن، هەر لەو شارەش حەوت كەس بێسەروشوێنن".

پۆلیسی ئیسرائیل راشیگەیاندووە: "لە شاری تامرا كە زۆرێك لە دانیشتووانەكەی عەرەبن 4 كەسی دیكە كوژراون".

هاوكات بەپێی راگەیەندراوی میدیاكانی ئیسرائیل، پێشبینی دەكرێت لە شوێنی ئەو هێرشە مووشەكییەی كراوەتە سەر شاری باتیام 35 بێسەروشوێن بن.

بەرەبەیانی رۆژی هەینی 13-6-2025، ئیسرائیل بە ئۆپەراسیۆنی (شێری راپەڕیو)، بە بەشداریی نزیكەی 200 فڕۆكەی جەنگی، هێرشێكی بەرفراوانی كردە سەر زیاتر لە 200 ئامانج و بنكە ئەتۆمی و سەربازیی ئێران، كە بووە هۆی كوژرانی دەیان فەرماندەی باڵای سوپای پاسداران و شەش زانای ئەتۆمی ئەو وڵاتە، لە بەرامبەردا، ئێران ئۆپەراسیۆنی (بەڵێنی راست 3) ی راگەیاند و بە چەندین زنجیرە هێرشی مووشەكی وەڵامی دایەوە و تاوەكو ئێستا هێرشی مووشەكی هەردوو وڵات بۆسەر یەكتر بەردەوامە.

PUKMEDIA