ئیلۆن مەسك ئینتەرنێتی ستارلینك بۆ ئێران چالاك دەكات

telegrafi

Starlink

ئیلۆن مەسك، ئینتەرنێتی بێبەرامبەر بۆ هاووڵاتیانی ئێران دابیندەكات، ئەمەش بەپێی وەڵامی خاوەنی كۆمپانیای  SpaceX ە، بۆ دابینكردنی ئینتەرنێت كە بۆ هاووڵاتییەكی ئێرانی نووسیوە.

بەهۆی بچڕان و سنوورداركردنی ئینتەرنێت لە ئێران، كۆمپانیای SpaceX ی ئێلۆن مەسك، خزمەتگوزاری Starlink ی لەو وڵاتە چالاككرد و بەپێی هەواڵێكی وێبسایتی ئێران ئینتەرناشناڵ، ئیلۆن مەسك كە سەرمایەدارێكی گەورەی جیهانیی و خاوەنی كۆمپانیای SpaceX ە، لە وەڵامی هاووڵاتییەكی دانیشتووی ئێراندا، كە لە تۆڕی كۆمەڵایەتی ( X) داوایلێكردووە ئینتەرنێت بۆ خەڵكی ئێران دابینبكات، لە بەرامبەردا مەسك وەڵامی داوەتەوە و رایگەیاندووە: "ئێستا تیشكەكانی ستارلینك لە ئێران چالاكن".

ئەمەش لە كاتێكدایە، بەهۆی هێرشەكانی ئیسرائیل بۆ سەر ئێران، هێڵەكانی ئینتەرنێت لە ئێران بەتەواوەتی سنووردار كراون و هاووڵاتیان ناتوانن بە ئاسانی بەكار بهێنن.

پێشتریش بەهۆی كوشتنی ژینا ئەمینی لە رۆژی 16ی ئەیلولی 2022 و لێكەوتەكانی ئەو رووداوەوە، هێڵەكانی ئینتەرنێت لە ئێران بەتەواوەتی سنووردار كران و هاووڵاتیان نەیاندەتوانی بە ئاسانی بەكاری بهێنن، هەربۆیە ئێلۆن مەسك رەزامەندی دەربڕی بە چالاككردنی خزمەتگوزاریی Starlink لە ناو ئێراندا.

بەرەبەیانی رۆژی هەینی 13-6-2025، ئیسرائیل بە ئۆپەراسیۆنی (شێری راپەڕیو)، بە بەشداریی نزیكەی 200 فڕۆكەی جەنگی، هێرشێكی بەرفراوانی كردە سەر زیاتر لە 200 ئامانج و بنكە ئەتۆمی و سەربازیی ئێران، كە بووە هۆی كوژرانی دەیان فەرماندەی باڵای سوپای پاسداران و 6 زانای ئەتۆمی ئەو وڵاتە، بەپێی ئاماری رەسمیی ئێران-یش، 78 كەس كوژراون و زیاتر لە 320 كەسی دیكەش بریندار بوون.

لە بەرامبەردا، ئێران ئۆپەراسیۆنی (بەڵێنی راست 3) ی راگەیاند و بە چەندین زنجیرە هێرشی مووشەكی وەڵامی دایەوە و تاوەكو ئێستا، دوو كەس كوژراون و 80 كەسی دیكەش بریندار بوون و چەندین باڵەخانەش لە تەلئەبیب بەتەواوەتی رووخاون.

PUKMEDIA