سەرۆک کۆمار بەشدارى لە سێیەمین کۆنفرانسی نەتەوەیەکگرتووەکان بۆ ئۆقیانوسەکان کرد

راگەیاندنی سەرۆکایەتی کۆمار

د. لەتیف جەمال رەشیید سەرۆک کۆمارى عیراق

ئەمڕۆ سەرۆک کۆمارى عیراق لە سێیەمین کۆنفرانسی نەتەوەیەکگرتووەکان بۆ ئۆقیانوسەکان کە لە شاری نیس – فەرەنسا بەڕێوەدەچێت  بەشدارى کرد و رایگەیاند: "بەشداری عیراق لەم کۆنفرانسەدا لە باوەڕێکی قووڵەوە سەرچاوە دەگرێت".

د.لەتیف جەمال رەشید سەرۆک کۆمارى عیراق، ئەمڕۆ دووشەممە 9ى6ى2025  بەشداری لە سێیەمین کۆنفرانسی نەتەوەیەکگرتووەکان بۆ ئۆقیانوسەکاندا کرد و لە وتارێکیدا رایگەیاند: "ئەمڕۆ کە بەشدارى ئەم کۆنفرانسە گرنگە دەکەین، بۆ ئاڵوگۆڕی دیدگا و بەرزکردنەوەی هاریکاری نێوان وڵاتەکانمانە بۆ رووبەڕوو بوونەوەی ئاستەنگە هاوبەشەکان و داڕشتنی ئایندەیەکی سەقامگیرتر و دادپەروەرانەتر ".

"سەرچاوەکانی ئاو بە ئۆقیانوس-ەکانیشەوە پرسێکی مرۆیی و ئەمنی و گەشەپێدانە، کە ساڵانێکی زۆرە لە دەرەوەی چەترێکی گونجاوی پاراستنی یاسایی ماوەتەوە"، سەرۆک کۆماری عیراق واى وت.

هەر لە وتارەکەیدا ئەوەى خستەڕوو: "بەشداری عیراق لەم کۆنفرانسەدا لە باوەڕێکی قووڵەوە سەرچاوە دەگرێت و کاری فرەلایەنە و پابەندبوون بە بەهێزکردنی هاوبەشییە نێودەوڵەتییەکان بەگرنگ دەزانین بۆ چارەسەرکردنی کاردانەوەکانی گۆڕانی کەشوهەوا، وشکەساڵی، نایەکسانی ئابووری، قەیرانەکانی ئاسایشی خۆراک".

باسیلەوەشکرد: "ئەمڕۆ لە ژێر رۆشنایی خێراتربوونی گۆڕانی کەشوهەوا، بەرزبوونەوەی ئاستی پیسبوونی دەریایی و لەدەستدانی سیستمی ژینگەیی رووبەڕووی پەرەسەندنی ئاڵنگارییەکان دەبینەوە، کە پێویستی بە کاری یەکلاکەرەوە و هاوبەشی جیهانی راستەقینە هەیە لەسەر بنەمای زانستی و تەرخانکردنی بودجە بۆ پاراستنی ئۆقیانوسەکان و سەرچاوە ئاوییەکانمان".

سەرۆکۆمارى عیراق ئاماژەى بەوەشدا: "ئاسایشی ئۆقیانوسەکان تەنها پرسێکی ژینگەیی نییە، بەڵکو بابەتی ئاسایشی نێودەوڵەتی و مرۆییە بۆ زۆرێک لە وڵاتان، بەتایبەتی ئەوانەی بەدەست کەمی سەرچاوەی ئاو و بەرزبوونەوەی ئاستی دەریاوە دەناڵێنن، ئەمە لەژێر رۆشنایی بەرزبوونەوەی خێرای پلەی گەرمی ئاو و خراپتربوونی ترشبوونی ئۆقیانوسەکان و کەمبوونەوەی کۆگاکانی ماسی و زیادبوونی پیسبوون بەهۆی پلاستیک و ماددە کیمیاییەکانەوە".

ئەوەشى راگەیاند: "عیراق لەگەڵ کەمبونەوەی ئاوی رووبارەکانی دیجلە و فورات رووبەڕووی ئاڵنگارییەکی گەورە دەبێتەوە، بەهۆی چەند هۆکارێکەوە، لەوانە گۆڕانی کەشوهەوا، نەبوونی سیاسەتێکی یەکگرتووی ئیداری و یاسایی بۆ رووبارەکانی سنووربەزێن، هەروەها دابەزینی رێژەی ئاوی عیراق لە وڵاتانی سەرەوەی روبارەکانەوە، کە بووەتە هۆی زیادبوونی ئاوارەبوونی ناوخۆیی و دەرەکی و دابەزینی ئاستی بەرهەمی کشتوکاڵی و بەرهەمی ناوخۆیی گشتی".

ئەوەشى خستەڕوو: "ئەوەی ئەمڕۆ لەم کۆنفرانسە پێویستمانە ئەوەیە کە رێککەوتنێکی بەکۆمەڵ بکەین بۆ داڕشتنی ستراتیژێکی جیهانی بۆ پاراستنی ئۆقیانوسەکان و بەهێزکردنی پابەندبوونە نێودەوڵەتییەکان لە رێگەی پلانێکەوە کە لەسەر بنەمای رێککەوتننامەی دەریا گەورەکان دامەزراوە"

د. لەتیف جەمال رەشیید سەرۆککۆمارى عیراق راشیگەیاند: "داوای فراوانکردنی پەیوەندی و هاوبەشی کاریگەر لە نێوان حکومەتەکان، کۆمەڵگەی مەدەنی، کەرتی تایبەت و دامەزراوە توێژینەوەکان دەکەین، هەروەها داواکارین پشتیوانی دارایی داهێنەرانە و بەردەوام بۆ پاراستنی ئۆقیانوسەکان و هەماهەنگی و هاوکاری بۆ گەیشتن بە رێککەوتن بکرێت لەسەر ئاو، رووبار، دەریاچەکان کە خزمەت بە بەرژەوەندی هەمووان بکات".

رۆژى یەکشەممە 8ی6ی2025 سەرۆککۆمار و خانمی یەکەمی عیراق، بەمەبەستی بەشداریکردن له سێهەمین کۆنفرانسی نەتەوە یەکگرتوەکان لەسەر ئۆقیانووسەکان  بەرەو فەرەنسا رۆیشتون. 

PUKMEDIA