وه‌فدی فراكسیۆنه‌ كوردستانییه‌كان بۆ چاره‌سه‌ری گرفته‌كان سه‌ردانی خانه‌قین ده‌كات

ميدياكان

خانەقین

لەسەر داوای مەڵبەندی یەكێتی لە خانەقین، وەفدێكی باڵای فراكسیۆنە كوردستانییەكانی ئەنجومەنی نوێنەران سەردانی خانەقین دەكات و بەدواداچوون بۆ كێشە و گرفتەكانی ناوچەكە دەكات، بڕیاردەری فراكسیۆنی یەكێتیش دەڵێت: "وەفدەكە لە سەرۆكی فراكسیۆنە كوردستانییەكان پێككهاتووە و دەمانەوێت بە یەكگرتوویی كێشە و گرفتی ناوچە كێشە لەسەرەكان چارەسەر بكەین".

كاروان یاروەیس بڕیاردەری فراكسیۆنی یەكێتی لە ئەنجومەنی نوێنەرانی عیراق، بە وێبساتی رەسمی یەكێتیی نیشتمانیی كوردستان PUKMEDIA ی راگەیاند: "لەسەر داوای مەڵبەندی رێكخستنی خانەقینی یەكێتی، بۆ بەدواداچوون بۆ كێشە و گرفتەكانی خانەقین و دەوروبەری، سبەینێ 22-5-2025، وەفدێكی باڵای فراكسیۆنە كوردستانییەكان لە ئەنجومەنی نوێنەرانی عیراق سەردانی خانەقین دەكات".

"بەشێك لە كێشە و گرفتەكانی خانەقین و دەوروبەری بریتین لە نەبوونی پێداویستی خزمەتگوزاری و ئەو كێشانەی لە بازگەكان بۆ ئەو بارهەڵگرانە دروستدەكرێن كە لە خاڵە سنوورییەكانی هەرێمی كوردستانەوە بار بۆ خانەقین دەگوازنەوە" كاروان یاروەیس وادەڵێت.

راشیگەیاند: "دەمانەوێت بە یەكگرتوویی كێشە و گرفتی ناوچە كێشە لەسەرەكان چارەسەر بكەین، هەر بۆیە وەفدەكە كە لە سەرۆكی سەرجەم فراكسیۆنە كوردستانییەكان پێككهاتووە و سبەینێ لەگەڵ لایەنە پەیوەندیدارەكانی خانەقین و دامو دەزگاكانی حكومەت كۆدەبێتەوە، بۆ ئەوەی لە نزیكەوە ئاگاداری گرفتەكانی پارێزگاكە و دەروروبەری بێت و لەگەڵ حكومەتی فیدراڵ چارەسەریان بۆ بدۆزینەوە".

PUKMEDIA