وتەبێژی کۆمسیۆن: جارێکی دیکە ماوەی تۆماركردنی حزب و هاوپەیمانێتییەكان درێژكرايەوە

PUKMEDIA

جومانە غەلای وتەبێژی كۆمسیۆنی سەربەخۆی هەڵبژاردنەكانی عیراق

كۆمسیۆنی باڵای سەربەخۆی هەڵبژاردنەكانی عیراق، ماوەی تۆماركردنی حزب و هاوپەیمانێتییەكانی بۆ بەشداریكردن لەهەڵبژاردنی داهاتووی ئەنجومەنی نوێنەران بۆماوەی 6 رۆژی دیکە درێژكردەوە، وتەبێژی كۆمسیۆنیش دەڵێت: "لەساڵی 2015 ەوە تا ئەمڕۆ زیاتر لە 330 حزب ناوی خۆیان لەكۆمسیۆن تۆمار كردووە".

جومانە غەلای وتەبێژی كۆمسیۆنی سەربەخۆی هەڵبژاردنەكانی عیراق لە لێدوانێكی تایبەتدا بە وێبسایتی رەسمی یەكێتیی نیشتمانیی كوردستان PUKMEDIA  ی راگەیاند: "بۆ دووەمجار ئەنجومەنی كۆمسیارانی كۆمسیۆنی باڵای سەربەخۆی هەڵبژاردنەكانی عیراق ،ماوەی 6 رۆژی دیکەی بۆ خۆتۆمارکردنی ئەو حزب و هاوپەیمانێتییانەی دەیانەوێت بەشداری لەهەڵبژاردنی ئەنجومەنی نوێنەراندا بكەن درێژکردەوە".

"پێناچێت سەرجەم ئەو حزب و هاوپەیمانێتییانەی پێشتر لای كۆمسیۆن تۆماركراون، بەشداری لە هەڵبژاردنەكەدا بكەن، بۆیە ئەوانەی ویستی بەشدارییان هەیە، پێویست بوو جارێكی دیكە سەردانی كۆمسیۆن بكەن و خۆیان تۆمار بكەنەوە"، جومانە غەلای وایوت.

دەربارەی ژمارەی حزب و هاوپەیمانێتییەكانیش كە پێشتر لای كۆمسیۆن تۆماركراون، وتەبێژی كۆمسیۆن ئاشكرای كرد: "لەساڵی 2015ەوە هەتا ئەمڕۆ ژمارەی لایەنە سیاسییە تۆماركراوەكان زیاتر لە 330 حزبن، داواشیان لێكراوە بۆ مەبەستی نیشاندانی ویستی بەشدارییان سەردانی كۆمسیۆن بكەن، لەو ژمارەیەش هەتا ئەمڕۆ 70 حزب و هاوپەیمانی سیاسی كە لە دامەزراندان و 80 حزب و هاوپەیمانی پێشوو داواكاری بەشداریكردنیان لەهەڵبژاردن پێشكەش كردووە، هەروەها 5 هاوپەیمانی نوێش تۆماركراون".

ئه‌نجومه‌نی وه‌زیرانی عیراق، رۆژی 9ی4ی2025 له‌ كۆبوونه‌وه‌ی ئاسایی خۆیدا، رۆژی 11ی11ی2025ی وه‌ك رۆژی ئه‌نجامدانی هه‌ڵبژاردنی ئه‌نجومه‌نی نوێنه‌ران دیاریكردو بۆ ئه‌و مه‌به‌سته‌ش كۆمسیۆن رۆژی 15-4-2025 ده‌رگای ناوتۆماركردنی حزب و هاوپه‌یمانێتییه‌كانی كردوه‌و ئه‌مڕۆش كۆتا رۆژه‌ بۆ تۆماركردنیان و هه‌ر حزب و هاوپه‌یمانێتییه‌ك ناوی تۆمار نه‌كردبێت، ناتوانێت به‌شداری هه‌ڵبژاردنی داهاتووی ئه‌نجومه‌نی نوێنه‌ران بكات.

PUKMEDIA