وەزیری پێشمەرگە: زیاتر لە 65 هەزار پێشمەرگە زەوی وەردەگرن

تایبەت

وەزیری پێشمەرگە لەگەڵ لیژنە هاوبەشەکە

لیژنەی هاوبەشی زەوی لە نێوان وەزارەتی پێشمەرگە و وەزارەتی شارەوانی سەردانی وەزیری پێشمەرگەیان کرد و دوایین راپۆرتی کاروبارەکانی پێدانی زەوییان بە هێزی پێشمەرگەی کوردستان و وەزیری پێشمەرگە گەیاند.

لەو کۆبوونەوەیەدا شۆڕش ئیسماعیل وەزیری پێشمەرگەی حکومەتی هەرێمی کوردستان وێڕای بەخێرهاتنی ئەندامانی لیژنە هاوبەشەکە، دەستخۆشی لێکردن لەبەرامبەر هەوڵ و ماندووبوونیان لە وردبینی و بەجێگەیاندنی کاروبارەکانی پێدانی زەوی بە پێشمەرگە، کە تائێستا 9 هەزارپێشمەرگە سوودمەند بوون و لە قۆناغەکانی داهاتووشدا ڕێژەکە بەرز دەبێتەوە، بەشێوەیەکی گشتی 65 هەزار و 667 پێشمەرگە بە حەوت قۆناغ سوودمەند دەبن لە پێدانی زەوی لە ناوچەکانی نیشتەجێبوون.

وەزیری پێشمەرگە راشگەیاند: "ئەمە دەستکەوتێکی گەورەیە بۆ هێزی پێشمەرگەی کوردستان، دەتوانرێت لە ئایندەدا حکومەتی هەرێمی کوردستان هاوکاری زیاتر پێشکەش بە پێشمەرگە بکات تاکو ئەو زەوییانەی وەریانگرتووە بیکەن بە یەکەی نیشتەجێبوون، ئەمەش هاوکار و پاڵپشتییەکی گەورەیە بۆ پێشمەرگەی کوردستان".

هاوکات وەزیری پێشمەرگە رێزلێنانی بەخشی بە ئەندامانی لیژنە هاوبەشەکەو هیوای سەرکەوتن و بەردەوامی بۆ خواستن لە کارەکانیان و ئەو خزمەتەی دەیگەیەنن بە وەزارەتی پێشمەرگە و هێزی پێشمەرگەی کوردستان.

PUKMEDIA