دابه‌شنه‌كردنی مووچه‌ له‌هه‌رێم 40 رۆژی تێپه‌ڕاند

PUKMEDIA

دراوی عیراقی

زیاتر له‌ 40 رۆژه‌ مووچه‌خۆرانی هه‌رێمی كوردستان مووچه‌یان وه‌رنه‌گرتووه‌و له‌عیراق دابه‌شكردنی مووچه‌ی مانگی پێنج (ئایار) ده‌ستپێكردووه‌، له‌كاتێكدا مووچه‌خۆرانی هه‌رێم چاوه‌ڕێی مووچه‌ی مانگی نیسانن، له‌گه‌ڵ ئه‌وه‌ی دارایی هه‌رێم ماوه‌ی 15 رۆژه‌ لیستی مووچه‌ی بۆ به‌غدا ناردووه‌، به‌ڵام تائێستا هیچ بڕ‌یارێك بۆ ناردنی مووچه‌ی هه‌رێم نییه‌، ئه‌ندامێكی لیژنه‌ی دارایی له‌ئه‌نجومه‌نی نوێنه‌رانی عیراقی-ش ده‌ڵێت:" هۆكاری دواكه‌وتنی مووچه‌ كه‌می پاره‌ی كاشه‌". 

د.نه‌رمین مه‌عروف ئه‌ندامی لیژنه‌ی دارایی له‌ ئه‌نجوومه‌نی نوێنه‌رانی عیراق له‌ فراكسیۆنی یه‌كێتیی نیشتمانیی كوردستان رایگه‌یاند:"به‌پێی به‌دواداچوونه‌كانمان به‌هۆی كه‌می پاره‌ی كاش له‌به‌رده‌ستی حكومه‌تی عیراقدا فه‌رمانبه‌رانی هه‌رێمی كوردستان و به‌شێكی فه‌رمانبه‌رانی حكومه‌تی فیدراڵیش له‌كاتی خۆیدا مووچه‌یان وه‌رنه‌گرتووه‌".

"هه‌روه‌ها دواكه‌وتنه‌كه‌ په‌یوه‌ندی به‌پرۆسه‌ی به‌ دیناركردنی ئه‌و داهاته‌شه‌وه‌ هه‌یه‌، كه‌ له‌ فرۆشتنی نه‌وت ده‌ستی ده‌كه‌وێت، چونكه‌ پرۆسه‌كه‌ خاوبووه‌ته‌وه‌ به‌هۆی ئه‌و رێكارانه‌ی گیراوه‌ته‌ به‌ر له‌فرۆشتنی دۆلار به‌ بازرگانه‌كان و هاورده‌كاران و گه‌شتیاران"، د.نه‌رمین مه‌عروف وای وت.

ئاماژه‌ی به‌وه‌شدا:" پێداویستییه‌كانی خه‌رجی حكومه‌ت رۆژ به‌رۆژ له‌زیادبووندایه‌ و ئه‌مه‌ش وایكردووه‌ له‌ هه‌ندێك له‌ مانگه‌كاندا كه‌می پاره‌ی كاش دروست ببێت، دواكه‌وتنه‌كه‌ په‌یوه‌ندی به‌ كێشه‌ و قه‌یرانی ئابوورییه‌وه‌ نییه‌". 

ئه‌مه‌ش له‌كاتێكدایه‌، رۆژی 26-3-2025 وه‌زاره‌تی دارایی هه‌رێم لیستی مووچه‌ی مانگی ئازاری بڵاوكرده‌وه‌و له‌ماوه‌ی سێ رۆژدا مووچه‌ی سه‌رجه‌م وه‌زاره‌ت و ده‌سته‌كانی دابه‌شكرد، به‌ڵام له‌پێش جه‌ژنی ره‌مه‌زانه‌وه‌ مووچه‌خۆرانی هه‌رێم هیچ مووچه‌یه‌كیان پێنه‌دراوه‌و مووچه‌خۆرانیش چاوه‌ڕێی مووچه‌ی مانگی نیسانیان ده‌كه‌ن، هاوكات حكومه‌تی هه‌رێم و وه‌زراه‌تی دارایی هیچ روونكردنه‌وه‌یه‌كیان به‌ڕه‌سمی له‌وباره‌یه‌وه‌ نه‌داوه‌.

PUKMEDIA