كاروان گەزنەیی: یەكێتی بە دوو هەزار پێشنیارەوە دیدار دەبەستێت

PUKMEDIA

كاروان گەزنەیی وتەبێژی دووهەمین دیداری یەكێتیی نیشتمانیی كوردستان

كاروان گەزنەیی وتەبێژی یەكێتی رایگەیاند: "یەكێتی بە دوو هەزار پێشنیارەوە دیدار دەبەستێت، ئامانج لەدیداریش داڕشتنی ستراتیژو سیاسەتی یەكێتی و زەمینەسازییە بۆ خۆگونجاندن لەگەڵ بارودۆخە هەرێمی و ناوخۆی و ناوچەییەكان".

كاروان گەزنەیی وتەبێژی دووهەمین دیداری یەكێتیی نیشتمانیی كوردستان لەكۆنگرەیەكی رۆژنامەوانیدا رایگەیاند: "سەعات 11ی رۆژی چوار شەممە 23-4-2025 لە هۆڵی پێشمەرگە لەسلێمانی، كەرنەڤاڵی دووەهەمین دیداری گشتی یەكێتیی نیشتمانیی كوردستان بەئامادەبوونی بافڵ جەلال تاڵەبانی سەرۆكی یەكێتیی نیشتمانیی كوردستان و بەسەرپەرشتی قوباد تاڵەبانی لێپرسراوی مەكتەبی سكرتاریەتی سەرۆك مام جەلال و سەرپەرشتیاری دیدار لەسلێمانی بەڕ‌ێوەدەچێت".

راشیگەیاند: "ئامانج لەدیدار بریتییە لەداڕشتنی ستراتیژو سیاسەتی یەكێتی و زەمینەسازییە بۆ خۆگونجاندن لەگەڵ بارودۆخە هەرێمی و ناوخۆی و ناوچەییەكان، دیدار مۆدێلێكی تازەی حزبایەتی و رووداوێكی گرنگی حزبایەتییە كەلەناوچەكەدا روودەوات".

وتەبێژی دووهەمین دیداری یەكێتیی نیشتمانیی كوردستان راشیگەیاند: "دوای ئەنجامدانی نۆ كۆنفرانس لەشارو شارۆچكەكانی هەرێمی كوردستان و بەبەشداری 12 هەزار كادرو پێشكەشكردنی زیاتر لە 70 پڕۆژەو دوو هەزار پێشنیار، یەكێتی بڕیاری ئەنجامدانی دووهەمین دیداریدا، ئەركی دیداریش بریتی دەبێت لەگوێگرتن لەبۆچوون و راسپاردەی هەڤاڵانمان و ئاڕاستەكردنی بە ئەنجومەنی سەركردایەتی و مەكتەبی سیاسی یەكێتی".

بەگوێرەی پەیڕ‌‌ەوی ناوخۆی پەسندكراوی كۆنگرەی پێنجەم، دیداری یەكێتی چالاكییەكی رەسمی دەورییەو بەشێكە لە وێستگەكانی خەباتی فراوانی هەڤاڵانە، كە یەكەمین دیداری گشتی یەكێتیی نیشتمانیی كوردستان لە 28ی5ی2022 لە سلێمانی بەئامادەبونی بافڵ جەلال تاڵەبانی سەرۆكی یەكێتیی نیشتمانیی كوردستان دەستیپێكردو چەند رۆژێكی خایاند، لە رۆژی 31ی5ی2022 كۆتایی هات، كە پێشتر لە 12ی3ی2022 كۆبونەوەی لیژنەی باڵای دیدار لە پارێزگا و شارەكانی هەرێم بەستراو تێیدا ئامادەكارییەكان بۆ دیدار بەڕ‌‌ێوەچوو، هەروەها لە رۆژی 15ی2ی2025 دەستیكردووە بە بەستنی كۆنفرانس بۆ ئەنجامدانی دووەمین دیداری خۆی، كە بەدروشمی"بەدیدگایەكی نوێ؛ بەهێزی و بەرەوپێشچوون و خزمەتگوزاری" دەستیبەكارەكانی كردووە. 

PUKMEDIA

كۆنگرەی رۆژنامەوانی كاروان گەزنەیی وتەبێژی دووهەمین دیداری یەكێتیی نیشتمانیی كوردستان