دابەزینی نرخی نەوت بەردەوامە

PUKMEDIA

نرخی نەوت

بەهۆی شەڕی بازرگانی نێوان ئەمریکا و چین و کەمبوونەوەی خواست لەسەر نەوت، تادێت نرخی نەوت دابەزین بەخۆیەوە دەبینێت.


پاش هەڵئاوسانی داتاكانی چین كە گەورەترین هاوردەكاری نەوتە لەناوچەكە، نرخی نەوت لەبازاڕەكانی ئاسیا بەڕێژەی 0.5% دابەزی، ئەمەش لەكاتێكدایە چین خۆی بۆ شەڕی بازرگانی لەگەڵ ئەمەریكا ئامادە دەكات.

ئەمڕۆ هەینی 11-4-2025، گرێبەستەكانی نەوتی خاوی برێنت بەڕێژەی 0.5% دابەزی بۆ 63.02 دۆلار بۆ هەر بەرمیلێك لە كاتێكدا گرێبەستەكانی نەوتی خاوی وێست تێكس-یش دابەزیوە، ئەمەش بەهۆی كاریگەری دواخستنی جێبەجێكردنی باجی گومرگی بۆ سەر چین-ە، لەلایەن دۆناڵد ترەمپ سەرۆكی ئەمەریكاوە، هاوكات بەرزبوونەوەی نرخی نەوتی ئەمەریكا كاریگەری لەسەر بازاڕەكانی نەوت هەبووە و ئاماژە بە بەهێزی دابینكردنی نەوت لە گەورەترین بەكارهێنەری سووتەمەنی جیهاندا دەكات. 

هاوكات بازرگانان نیگەرانن، چونكە دۆناڵد ترەمپ باجی گومرگی لەسەر چین بۆ 125% بەرزكردوەتەوە، ئەمەش بووەتە هۆی تۆڵەسەندنەوەی پەكین و شەڕی بازرگانی لەنێوان دوو گەورەترین ئابووری جیهاندا.

ئەمەش لەكاتێكدایە، سەرۆكی ئەمریكا هەڕەشەی خستنەسەری باجی زیادەی لە چین كرد بەرێژەی 104% ، كە رۆژی چوارشەممە 9-4-2025 بڕیارەكە یەكلایی بووەوە، بەڵام دواتر ئەمریكا بڕیاریدا جێبەجێكردنی بڕیارەكە دوابخات.


پێشتریش بەدیاریكراوی رۆژی 2ی4ی2025  دۆناڵد ترەمپ سەرۆكی ئەمریكا پێناسی گومرگی بەسەر هەموو كاڵایەكدا سەپاند كە هاوردەی ئەمریكا دەكرێت و رایگەیاند:"چیدیكە رێگە بە وڵاتان نادەن لەسەر حسابی ئەمریكا خۆیان دەوڵەمەند بكەن"، كەلەنێوانیاندا چین زۆرترین باجی خرایە سەرو لەكاردانەوەیدا هاوشێوەی ئەمریكا باجی زیاتریان خستەسەر كاڵا ئەمریكییەكان و جارێكیتر لەكاردانەوەدا دووبارە ئەمریكا هەڕەشەی خستنەسەری باجی دوو هێندەی لەسەر كاڵای ئەو وڵاتە كرد و ئەمڕۆ چووە بواری جێبەجێكردنەوە.

PUKMEDIA