بایكۆتی فراكسیۆنە كوردستانییەكان كۆبوونەوەی ئەنجومەنی نوێنەرانی هەڵوەشاندەوە

PUKMEDIA

ئەنجومەنی نوێنەرانی عیراق، مۆنیومێنتی شەهیدان لە هەڵەبجە

هەرچەندە بڕیاربوو سبەینێ سێ شەممە 8-4-2025، كۆبوونەوەی ئەنجومەنی نوێنەرانی عیراق ئەنجامبدرێت، بەڵام بەهۆی بایكۆتی فراكسیۆنە كوردستانییەكانەوە كۆبوونەوەكە هەڵوەشێندرایەوە.

چرۆ حەمەشەریف ئەندامی ئەنجومەنی نوێنەرانی عیراق لەفراكسیۆنی یەكێتی، بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: "لەگەڵ ئەوەی بڕیار بوو سبەینێ كۆبوونەوەی ئەنجومەنی نوێنەرانی عیراق ئەنجامبدرێت، بەڵام بەهۆی ئەوەی لەكارنامەی كۆبوونەوەكەدا پرسی بەپارێزگابوونی هەڵەبجەی تێدا نەبوو، سەرجەم فراكسیۆنە كوردستانییەكان بەكۆی دەنگ بایكۆتی كۆبوونەوەكەیان كردو لەلایەن جێگری سەرۆكی ئەنجومەنی نوێنەرانەوە كۆبوونەوەكە هەڵوەشێندرایەوە".

"فراكسیۆنە كوردستانییەكان بڕیاریانداوە هەتا پڕۆژەیاسای بەپارێزگابوونی هەڵەبجە نەخرێتە ناو كارنامەی دانیشتنی ئەنجومەنی نوێنەرانەوە رێگەنەدەن هیچ پڕۆژەیاسایەك تێبپەڕێندرێت" چرۆ حەمەشەریف وادەڵێت.

پڕۆژەیاسای بەپارێزگابوونی هەڵەبجە، ساڵی پار خوێندنەوەی یەكەم و دووەمی بۆ كرا، بەڵام لەمساڵدا زیاتر لە سێ جار خرایە ناو كارنامەی دانیشتنی ئەنجومەنی نوێنەرانەوەو فراكسیۆنە عەرەبییەكان بەبیانووی جۆراو جۆر رێگەیان نەدا پڕۆژە یاساكە تێبپەڕێندرێت، هەربۆیە فراكسیۆنە كوردستانییەكان هەڵوێستیان وەرگرت و بڕیاریانداوە هەتا پڕۆژەیاسای بەپارێزگابوونی هەڵەبجە نەخرێتە ناو كارنامەی دانیشتنی ئەنجومەنی نوێنەرانەوە رێگەنەدەن هیچ پڕۆژەیاسایەك تێبپەڕێندرێت.

PUKMEDIA