فراکسیۆنی یەکێتی: بێ بەپارێزگابوونی هەڵەبجە ناچینەوە هیچ کۆبوونەوەیەکەوە

PUKMEDIA

لۆگۆی یەكێتی، ئەنجومەنی نوێنەرانی عیراق

فراکسیۆنی یەکێتی و فراکسیۆنە کوردستانییەکانی دیکە مەرجیان بۆ بەشدرایکردن لە کۆبوونەوەکانی داهاتووی ئەنجومەنی نوێنەران هەیە و بریاردەری فراکسیۆنی یەکێتیش دەڵێت:" هەتا پرۆژە یاسای بە پارێزگابوونی هەڵەبجە تێنەپەڕێندرێت بەشداری لە هیچ کۆبوونەوەیەکی ئەنجومەنەکە ناکەین".


کاروان یاروەیس بڕیاردەی فراکسیۆنی یەکێتی لە ئەنجومەنی نوێنەرانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند :" ئێمە وەک فراکسیۆنی یەکێتی سورین لەسەر ئەوەی پرۆژەیاسای بە پارێزگابوونی هەڵەبجە لە دانیشتنەکانی داهاتووی پەرلەمان تێپەڕێنین، هەروەها هیچ پڕۆژە یاساییەک بێ تێپەڕبوونی بە پارێزگابوونی هەڵەبجە تێناپەڕێندرێت و ئێمە ناچینە هیچ کۆبوونەوەیەکی پەرلەمانەوە ".

" پێنج جار پرۆژە یاسای بە پارێزگابوونی هەڵەبجە خراوەتە بەرنامەی کارەوە، بەڵام بە بیانووی جیاجیا پرۆژەکە دەنگی پێنەدراوە و هەرجارەی لایەنێک بایکۆتی دانیشتنەکانی ئەنجومەنەکەی کردووە" کاروان یاروەیس وایوت.

بڕیاردەری فراکسیۆنی یەکێتی لە ئەنجومەنی نوێنەرانی عیراق ئاماژەی بەوە کردووە " تێپەڕاندنی پرۆژە یاساکان لە نێو پەرلەمان پێویستی بە رێکەوتنی سیاسی هەیە و یەکێتیی نیشتمانیی کوردستان هەمیشە لە بەرژەوەندی خەڵکی هەرێمی کوردستان هەوڵی ڕێککەوتنی داوە و
ئێمە هەوڵەکانمان بەردەوام دەبێت بۆ ئەوەی لەم خولەی پەرلەماندا پرۆژە یاسای بەپارێزگابوونی هەڵەبجە دەنگی لەسەر بدرێت".

ئەمەش لە کاتێکدایە فراکسیۆنی یەکێتی لە ئەنجومەنی نوێنەرانی عیراق هەموو هەوڵێکی خستۆتە گەڕ بۆ ئەوەی پرۆژە یاسای بەپارێزگابوونی هەڵەبجە تێپەڕێندرێت،بەڵام هێشتا دەنگی لەسەر نەدراوە، لە کاردانەوەشدا فراکسیۆنی یەکێتی و فراکسیۆنە کوردستانییەکان بڕیاریانداوە نەچنە هیچ دانیشتنێکەوە تا دەنگ بە پرۆژە یاسای بە پارێزگابوونی هەڵەبجە نەدرێت".

PUKMEDIA