دانیشتنەکانی نوێنەران دواخرا و فراکسیۆنە کوردستانیەکانیش هەڵوێستیان دەبێت

PUKMEDIA

هۆڵی دانیشتنی ئەنجومەنی نوێنەران

دووبارە دانیشتنی ئەنجومەنی نوێنەرانی عیراق بۆ دەنگدان لەسەر پرۆژە یاسای بەپارێزگابوونی هەڵەبجە دواخرا، لەبەرامبەردا فراکسیۆنە کوردستانییەکان بڕیاریاندا ئەگەر پڕۆژە یاسای بەپارێزگابوونی هەڵەبجە تێنەپەڕێنرێت، ئەوا دانیشتنەکانی پەرلەمان هەڵدەپەسێرن، چونکە ناکرێت پرۆژە یاسای بەپارێزگابوونی هەڵەبجە ببەسترێتەوە بە هیچ پرۆژە یاسایەکی دیکەوە، ئەندامێکی ئەنجومەنی نوێنەرانی عیراقیش دەڵێت:" دانیشتنەکە بۆ دوای جەژنی رەمەزانی پیرۆز دواخرا".

د. بڕیار رەشید ئەندامی ئەنجومەنی نوێنەرانی عیراق بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" وەک فراکسیۆنە کوردستانییەکان سەبارەت بە دواخستنی دانیشتنەکە و پرسی بەپارێزگابوونی هەڵەبجە لەگەڵ جێگری سەرۆکی پەرلەمان  کۆبووینەوە و رامانگەیاند، ئەگەر پڕۆژە یاساکە تێنەپەڕێنرێت سەرجەم فراکسیۆنە کوردستانییەکان دانیشتنەکانی پەرلەمان هەڵدەپەسێرین، چونکە ناکرێت پرۆژە یاسای بەپارێزگابوونی هەڵەبجە ببەسترێتەوە بە هیچ پرۆژە یاسایەکی دیکەوە".

" لەئێستاشدا دانیشتنەکە و دەنگدان لەسەر پرۆژە یاسای بەپارێزگابوونی هەڵەبجە دواخراوە بۆ دوای جەژنی رەمەزانی پیرۆز"، د.بڕیار رەشید وایوت.

ئەمەش لەکاتێکدایە شەوی رابردووش دانیشتنی ئەنجومەنی نوێنەرانی عیراق لەسەر پرسی بەپارێزگابوونی هەڵەبجە دواخرا بۆ ئەمشەو و بەڵام ئەمشەویش پرۆژە یاساکە تێنەپەڕێندرا، ئەمەش چەندین جارە دانیشتنەکان بۆ دەنگدان لەسەر ئەو پرسە دوادەخرێت.


PUKMEDIA