د. نەرمین مەعروف: لە مامەڵەی خانووبەرەدا کۆتایی بە تۆماری کاغەز بهێنرێت

پەڕەی د. نەرمین مەعروف

لیژنەی تایبەت بە پاراستنی موڵك و خانوبەرەی دەوڵەت راپۆرتی خۆیان پێششکەش دەکەن

لە دانیشتنی شەوی رابردووی  ئەنجومەنی نوێنەران راپۆرتی لیژنەی تایبەت بە پاراستنی موڵك و خانوبەرەی دەوڵەت پێشکەشکرا و ئەندامێکی ئەنجومەنەکەش دەڵێت:" گرنگە کۆتایی بە تۆماری کاغەز و پەیڕەوکردنی رێکار و سیستمی ئەلەکترۆنی لە فەرمانگەکانی تۆماری خانووبەرەدا بهێنرێت".

د.نەرمین مەعروف ئەندامی ئەنجومەنی نوێنەرانی عیراق لە  لیژنەی تایبەت بە پاراستنی موڵك و خانوبەرەی دەوڵەت لە راگەیەندراوێکیدا کە کۆپییەکی بۆ PUKMEDIA ناردووە، رایگەیاند:" لە دانیشتنی ئەمشەوی ئەنجومەنی نوێنەران دووشەممە 24ی3ی2025 راپۆرتی لیژنەی تایبەت بە (پاراستنی موڵك و خانوبەرەی دەوڵەت)مان پێشکەشکرد".

دەشڵێت:" لە ماوەی یەک ساڵ لە دەستبەکاربوونی ئەم لیژنە تایبەتە، توانیمان زانیاری وورد لەسەر ژمارە و جۆر و شوێنی موڵک و خانووبەرەی دەوڵەت کۆبکەینەوە ، و دەستنیشانی زۆرێک لەو مامەڵە نایاساییانە بکەین کە بەو خانوبەرە و موڵکە گشتیانەوە کراوە لە عیراق لە بیست ساڵی رابردوودا".

هەر لەڕاگەیەنراوەکەدا د. نەرمین ئاماژە بەوەشدەکات:" راپۆرتەکە تایبەت بوو بە راسپاردەکانی لیژنە بۆ چۆنێتی رێگریکردن و بەرەنگاربوونەوەی دەستدرێژیکردنە سەر موڵکی گشتی لەرێگەی دەرکردنی یاسایەکی تایبەت بە پاراستنی موڵکەکانی دەوڵەت و هەموارکردنەوەی ئەو  یاسا و رێنماییانەی  تۆمارکردن و مامەڵەکردن و کڕین و فرۆشتن بەو موڵکانەوە رێکدەخات لە عیراق دا.

د. نەرمین مەعروف ئەندامی ئەنجومەنی نوێنەران راشیگەیاندووە:" گرنگی کۆتایهێنان بە تۆماری کاغەز و پەیڕەوکردنی رێکار و سیستمی ئەلەکترۆنی لە فەرمانگەکانی تۆماری خانووبەرە ، و دانانی کەسانی پسپۆر و دەستپاک لە بەڕێوەبردنی ئەو دامەزراوانەی پەیوەندیدارن بە تۆمارکردن و بەکارهێنان و پاراستنی موڵکی گشتی، و دانانی پلانێکی ستراتیژی تۆکمە بۆ بەڕێوەبردنی موڵکەکانی دەوڵەت بە سەرپەرشتی سەرۆکوەزیران و بەبەشداری وەزارەتەکانی پلاندانان، داد، دارایی ، لەگەڵ جەختکردنەوەمان لە رۆڵی چاودێریکردن و بەدواداچوونی بەردەوامیی پەرلەمان بۆ ئەم دۆسێیە، بەشێکی دیکەی راپۆرتەکەی پێکدەهێنا".

PUKMEDIA