بریکاری وەزارەتی داد: بڕیارەکەی راگەیاندنی یەکێتی بەرپرسیارانەیە

PUKMEDIA

بۆردی راگەیاندنی یەكێتی نیشتمانی كوردستان

شیلان عارف بریكاری وەزارەتی دادی هەرێم پەیامێك ئاڕاستەی بۆری راگەیاندنی یەكێتیی نیشتمانیی كوردستان دەكات و رایدەگەیەنێت: "بڕیارەكەی راگەیاندنی یەكێتی بۆ راگرتنی هەواڵەكانی كوشتن و توندتیژی حەكیمانەو بەرپرسیارانەیە، چونكە ئەو كەیسانە خەریكە دەبنە دیاردەیەكی مەترسیداری نێو كۆمەڵگاو هیوادارین كەناڵ و دەزگاكانی تری راگەیاندن بڕیارێكی لەو بابەتە بدەن".


شیلان عارف بریكاری وەزارەتی دادی هەرێم لەپەیامێكدا رایگەیاند: "دوای بڵاوبوونەوەی چەندین كەیسی كوشتنی خێزانی (كوشتنی بەكۆمەڵ) لەچەند ناوچەیەكی هەرێمی كوردستان بووە هۆی ترس و دڵەڕاوكێیەكی زۆر لەنێو هاونیشتیمانیان و زیادبوونی توندوتیژی خێزانی و بەتایبەتیش بەهۆی رۆماڵی زۆربەی كەناڵە كوردییەكانەوە سات بەساتی كوشتنەكەیان دەگواستەوە، ئەمەش كاریگەری راستەوخۆی لەسەر دەرونی تاكەكانی كۆمەڵگا هەبوو، بەشێوەیەك بووەتە چاولێكەری و لاسایكردنەوەی تاوانەكە".

راشیگەیاند: "جێی خۆیەتی دەستخۆشییەكی تایبەت لەبۆردی راگەیاندنی یەكێتیی نیشتمانیی كوردستان بكەم كە ئەم ئێوارەیە بڕیاریدا بەڕاگرتنی هەواڵەكانی كوشتن و توندتیژی و بەتایبەتیش ئەو هەواڵانەی باسی مەرگ و كوشتنی خێزانی و هاووڵاتیان لەكوردستان دەكەن لەكەناڵەكانی سەر بە مەكتەبی راگەیاندنی یەكێتی، ئەمەش خۆی لە خۆیدا بڕیارێكی حەكیمانەو بەرپرسیارانەیە، چونكە ئەو كەیسانە خەریكە دەبنە دیاردەیەكی مەترسیداری نێو كۆمەڵگا".

بریكاری وەزارەتی داد دەشڵێت: "هیوادارین دوای بڕیارەكەی بۆری راگەیاندنی یەكێتی كەناڵ و دەزگاكانی تری راگەیاندن بڕیارێكی لەو بابەتە بدەن بۆ ئەوەی ریِژەی كوشتن و توندوتیژی لەكۆمەڵگا بەرەو كەمبوونەوە بچێت، دووبارە دەستخۆشییەكی زۆر بۆ بۆردی راگەیاندنی یەكێتیی نیشتمانیی كوردستان و كەناڵەكانی سەر بەمەكتەبی راگەیاندن بۆ ئەم بڕیارە بوێرانەیە هەر سەربەرزبن".

ئێوارەی ئەمڕۆ دوو شەممە 24-3-2025، بۆردی راگەیاندنی یەكێتیی نیشتمانیی كوردستان بڕیاریدا بەڕاگرتنی هەواڵەكانی كوشتن و توندتیژی و بەتایبەتیش ئەو هەواڵانەی باسی مەرگ و كوشتنی خێزانی و هاووڵاتیان دەكەن لەكەناڵەكانی سەر بە مەكتەبی راگەیاندنی یەكێتی.

PUKMEDIA