فراكسیۆنی یەكێتی داوای 100 هەزار دیناری بژێوی بۆ خانەنشینان دەكات

PUKMEDIA

لۆگۆی یەكێتی، ئەنجومەنی نوێنەرانی عیراق

حكومەتی عیراق بڕی 100 هەزار دینار وەك بژێوی بەخانەنشینانی عیراق دەدات و ئەندامێكی فراكسیۆنی یەكێتی لەئەنجومەنی نوێنەرانیش، داوای خەرجكردنی ئەو بڕە پارەیە بۆ خانەنشینانی هەرێم دەكات. 

د. نەرمین مەعروف ئەندامی لیژنەی دارایی ئەنجومەنی نوینەرانی عیراق لەفراكسیۆنی یەكێتی، بەوێبسایتی رەسمی یەكێتیی نیشتمانیی كوردستان  PUKMEDIA ی راگەیاند: "بەنووسراوی رەسمی داوام لە محەمەد شیاع سودانی سەرۆكوەزیرانی عیراق كرد كەبڕیاری خەرجكردنی 100 هەزار دینار بەناوی باشتركردنی بژێوییەوە، كەساڵی 2023 بۆ خانەنشینانی عیراق دەركرا، خانەنشینانی هەرێمیش بگرێتەوە، چونكە ئەوانیش خەڵكی عیراقن".

"لەكاتێكدا حكومەتی هەرێم لەمانگی 7ی ساڵی 2024 ەوە ئەو بڕە پارەیەی بۆ خانەنشینانی هەرێم خەرجكرد، بەڵام دواتر لەمانگی 1ی ئەمساڵەوە، بڕیاری خەرجكردنی 100 هەزار دینار بەناوی باشتركردنی بژێویی بۆ خانەنشینان راگرت، چونكە ئەو بڕیارە تەنها بۆ خانەنشینانی عیراق دەركراوە نەك خانەنشینانی هەرێم" د. نەرمین مەعروف وادەڵێت.

راشیگەیاند: "لەئێستادا چاوەڕوانی رەزامەندی سەرۆكوەزیران و وەزارەتی دارایی عیراقین بۆ دووبارە خەرجكردنەوەی ئەو بڕە پارەیە بۆ خانەنشینانی هەرێم، هاوكات پێمانوایە جێبەجێكردنی تەواوی یاساكە چەند مانگێكی پێبچێت".

بەپێی دەقی یاسای  ئەو بڕیارەی كە ساڵی 2023 بۆ خانەنشینانی عیراق دەركرا، بڕی ئەو پارەیەی بەناوی باشتركردنی بژێوییەوە بۆ خانەنشینان خەرجدەكرێت لەخانەنشینێكەوە بۆ خانەنشینێكی دیكە جیاوازەو بەگوێرەی بڕوانامەو ساڵانی خزمەت و وارسی شەهیدان و چەند تایبەتمەندییەكی دیكە دەگۆڕێت.

PUKMEDIA