شێخ جەعفەر: بەرزکردنەوەی ئاستیی توانا سەربازییەکانی پێشمەرگە گرنگە

نوسینگەی رۆژنامەوانی جێگری سەرۆکی هەرێم

شێخ جەعفەر و ستیڤن بیتنەر

جێگری سەرۆکی هەرێمی کوردستان رایدەگەیەنێت:"بەرزکردنەوەی ئاستیی توانا سەربازییەکانی پێشمەرگە گرنگە بۆ قۆناغی ئێستا و پاراستنی ئاسایش و سەقامگیری ناوچەکە"

ئەمڕۆ چوارشەممە ٢٠٢٥/٢/٢٦ بە ئامادەبوونی شێخ جەعفەر شێخ مستەفا جێگری سەرۆکی هەرێمی کوردستان، ستیڤن بیتنەر کونسولی گشتیی ئەمریکا لە هەرێمی کوردستان، فەریق ڕوکن عیسا عوزێر سەرۆکی ئەرکانی وەزارەتی پێشمەرگە، لیوا ڕوکن عومەر سالەح فەرماندەی هێزەکانی حەفتا و لیوا ڕوکن مەریوان محەمەد ئەمین فەرماندەی هێزەکانی پشتیوانی دووی پێشمەرگە، چەند چەکێکی تازە لە جۆری چەکی قورس لە مەیدانی مەشق و ڕاهێنانەکان لە لایەن ئەفسەران و پێشمەرگەوە ڕاهێنانی لەسەر کرا و تاقیکرانەوە.

جێگری سەرۆک سوپاسی هێزی هاوپەیمانانیی کرد بە تایبەت ئەمریکا، لە بەرامبەر بەردەوامبوونی هاوکاریی و پشتیوانییەکانیان و پێشکەشکردنی چەکی پێشکەوتووی سەردەمیانە بۆ هێزی پێشمەرگە، هەروەها جەختی کردەوە کە بەردەوامبوونی مەشق و ڕاهێنانەکان لەسەر ئەم جۆرە چەک و تەکنەلۆژیا نوێیانە توانا سەربازییەکانی وەزارەتی پێشمەرگە و پێشمەرگەی کوردستان،دەگەیەنێتە قۆناغی بونیادنانی توانا سەربازییەکان و بەرزکردنەوەی هونەری ڕووبەڕووبوونەوەی شەڕ و بەرگریکردن.

PUKMEDIA