یەكەمین كۆنفڕانسی زانستیی نێودەوڵەتی سەرۆك جەلال تاڵەبانی لە زانكۆی سلێمانی رێكدەخرێت

PUKMEDIA

سەرۆک مام جەلال

زانــكۆی ســلــێمـانـی بەهەمئاهەنگی دامەزراوەی سەرۆك جەلال تاڵەبانی‌ و هەریەك لە زانكۆكانی (كۆیە، ڕاپەڕین، هەڵەبجە، گەرمیان، پۆلیتەكنیكی سلێمانی، پۆلیتەكنیكی گەرمیان، كۆمار، تیشكی نێودەوڵەتی‌ و قەیوانی نێودەوڵەتی)، بەدروشمی (سەرۆك مام جەلال ڕاستی‌ و هەڵوێستە مێژووییەكان)، یەكەمین كۆنفڕانسی زانستیی نێودەوڵەتیی سەرۆك جەلال تاڵەبانی ئەنجامدەدات.

كۆنفڕانسەكە، بەسەرپەرشتی (پڕۆفیسۆر دكتۆر كۆسار محەمەد عەلی) سەرۆكی زانكۆی سلێمانی‌ و (دكتۆر محەمەد ئیسماعیل سابر) بەرپرسی دامەزراوەی سەرۆك جەلال تاڵەبانی، لە ڕۆژانی (٣ و ٤)ی تشرینی یەكەمی ٢٠٢٥ لە هۆڵەكانی كۆنگرێسی زانكۆی سلێمانی بەڕێوەدەچێت، كە هاوكاتە لەگەڵ حەوتەمین ساڵیادی كۆچی دوایی سەرۆك مام جەلال.

لەكۆنفڕانسەكە، (نۆ) تەوەری زانستی دەربارەی (ژیاننامە‌ و كەسایەتی سەرۆك مام جەلال، ڕەهەندی سیاسی‌ و هزری‌ و شۆڕشگێری سەرۆك تاڵەبانی، ڕۆڵی لە چەسپاندن‌ و سەروەری یاسا، ڕۆڵ‌ و كاریگەری سیاسەتی سەرۆك مام جەلال لە گرنگیدان بە پرس‌ و مافەكانی ژنان، كاریگەرییە ئەرێنییەكانی لەسەر سەقامگیری‌ و هاوسەنگیی سیاسی لە هەرێمی كوردستان‌ و عێراق، ڕۆڵی لە بواری پەروەردە و خوێندنی باڵا، ڕۆڵی لە بەدەستهێنان‌ و دابینكردنی مافەكانی نەتەوەی كورد لە هەر چوار پارچەكەی كوردستان‌ و مافی نەتەوەكانی ترو كەمایەتییەكان لە عێراقدا، ڕۆڵی لە ڕەوتی ئازادی ڕادەبڕین‌ و مافی مرۆڤ‌ و ئازادی میدیا‌ و چاپەمەنی لە هەرێمی كوردستان‌ و نەخش‌ و جێدەستی لە بواری سیاسی‌ و دبلۆماسیەتی گشتیدا) لەخۆدەگرێت.

کاتە گرنگەکانی کۆنفڕانس:

١٦/ ٠٢/ ٢٠٢٥ ڕاگەیاندنی کۆنفڕانس.
٠١/ ٠٤ / ٢٠٢٥ کۆتا کاتی وەرگرتنی پوختەی توێژینەوەکان.
١٥/ ٠٤ / ٢٠٢٥ وەڵامدانەوەی پوختە پەسەندکراوەکان.
٠١ / ٠٨ / ٢٠٢٥ دوا کات بۆ ناردنی توێژینەوەکان بە تەواوکراوی.
٠١ /٠٩ / ٢٠٢٥ ڕاگەیاندنی توێژینەوە پەسەندکراوەکان.
٣ – ٤/ ١٠ / ٢٠٢٥ ئەنجامدانی کۆنفڕانس لە زانکۆی سلێمانی ــ هۆڵەکانی کۆنفڕانس دەبێت.

ئەمەش لەکاتێکدایە، یەكەمین كۆنفڕانسی زانستیی نێودەوڵەتیی سەرۆك جەلال تاڵەبانی لەلایەن حەوت لیژنەوە بەڕێوەدەبرێت، كە بریتین لە لیژنەكانی (زانستی، ئامادەكاری، ڕاگەیاندن‌ و (IT)، ڕاوێژكاری، پەیوەندی‌ و پڕۆتۆكۆل، ئەندامانی زانكۆ هاوبەشەكان‌ و دارایی).

بەمەبەستی وەگرتنی زانیاری زیاتر لەسەر ئامانجەكانی كۆنفڕانسەكە و وردەكاری زیاتر، توێژەران‌ و بەشداربووان دەتوانن لەم وێبسايتە تایبەتەدا بەدواداچوونی زیاتر بكەن:
https://pjtconference.univsul.edu.iq/

PUKMEDIA