CPT: لەدوو بۆردومانی فڕۆكەی بێفڕۆكەواندا شەش هاووڵاتی گیانلەدەستدەدەن

ميدياكان

بۆردومانی فڕۆكە بێفڕۆكەوانەكانی سوپای توركیا

بەهۆی دوو بۆردومانی فڕۆكە بێفڕۆكەوانەكانی سوپای توركیا، لە سنووری پارێزگای دهۆك و ئیدارەی راپەڕین، شەش هاووڵاتی مەدەنی گیانیان لەدەستداو هاووڵاتییەكیش بریندارە.

رێكخراوی CPT ی ئەمریكی لەبارەی رووداوەكەی گوندی شەهیێ-ی ناحیەی دینارتە رایگەیاندووە: "سەعات 11:30 دەقیقەی پێشنیوەڕۆی ئەمڕۆ 27-1-2025، فڕۆكە بێفڕۆكەوانەكانی سوپای توركیا بۆردومانی سنووری گوندی شەهیێ-ی سەر بە ناحیەی دینارتەیان لە قەزای ئاكرێ كردو بەهۆیەوە دوو هاووڵاتی مەدەنی كە هاوسەری یەكتربوون گیانیان لەدەستدا".

راشیگەیاندووە: "قوربانییەكان دانیشتووی كۆمەڵگای بامشمش-ن و پیاوەكە ناوی جەعفەر جەلال نپاخی تەمەن 58 ساڵ و هاوسەرەكەشی ناوی تین محەمەدی تەمەن 47 ساڵەو بۆ كاری كشتوكاڵ و چاندن لەگەڵ چەند هاووڵاتییەكی دیكەدا چوونەتە گوندی شەهیێ و تووشی ئەم رووداوە بوون".


هاوكات هەر ئەمڕۆ، توركیا بە فڕۆكەی بێفڕۆكەوان، ئۆتۆمبێلێكی لەگوندی گردجان لەسنووری رانیە كردە ئامانج و بەهۆیەوە 4 كەس گیان یانلەدەستداو كەسێكی دیكەش بریندار بوو.

هەر لەوبارەیەوە رێكخراوی CPT ی ئەمریكی لەبارەی رووداوەكەی گوندی گردجانی سەر بە ناحیەی چوارقوڕنە رایگەیاندووە: "سەعات 3:20 دەقیقەی دوانیوەڕۆی ئەمڕۆ، فڕۆكە بێفڕۆكەوانەكانی توركیا، ئۆتۆمبێلێكی جۆری تۆیۆتا لاندكروزەریان لەسەر رێگای سەرەكی گوندی گردجان لە ناحیەی چوارقوڕنەی سەر بە ئیدارەی راپەڕین بە ئامانجگرت و بەهۆیەوە چوار كەس گیانیان لەدەستداوە كە دوو كەسیان لەڕەگەزی نێرو دووانەكەی تریشیان لەڕەگەزی مێ-ن، هەروەها هاووڵاتییەك كە ماتۆڕسوار بووە بەهۆی بەركەوتنی بە پارچەی بۆردومانەكە برینداربووە، تا ئێستا ناسنامەی پێكراوەكانیش نەزانراوە.


بەپێی زانیارییەكانی PUKMEDIA، لە ساڵی 1991 ەوە تاوەكو ئێستا 720 هاووڵاتی مەدەنی بوونەتە قوربانی بۆردومان و لەشكركێشییەكانی توركیا لەهەرێمی كوردستان، بەشێوەیەك 353 هاووڵاتی مەدەنی شەهیدو 367 هاووڵاتی دیكەی مەدەنی بریندار  بوون.

هەر بەپێی زانیارییەكانی PUKMEDIA، تەنها لەماوەی ئەم مانگەدا، بەهۆی بۆردومانی فڕۆكە بێفڕۆكەوانەكانی سوپای توركیاوە، 8  هاووڵاتی لەهەرێمی كوردستان گیانیان لەدەستداوە، كەچوار كەسیان خەڵكی پارێزگای دهۆكن.

PUKMEDIA