سه‌رۆكی فراكسیۆنی یه‌كێتی: گرنگه‌ هه‌ولێر خۆی له‌گه‌ڵ به‌غدا بگونجێنێت

PUKMEDIA

هه‌رێم كه‌مال ئاغا سه‌رۆكی فراكسیۆنی یه‌كێتی له‌ ئه‌نجومه‌نی نوێنه‌ران

سه‌رۆكی فراكسیۆنی یه‌كێتیی نیشتمانیی كوردستان له‌ئه‌نجومه‌نی نوێنه‌رانی عیراق رایده‌گه‌یه‌نێت: "تیمه‌كه‌ی هه‌رێمی كوردستان له‌ چه‌ند رۆژی داهاتوودا سه‌ردانی به‌غدا ده‌كاته‌وه‌و هاوكات لێدوانه‌ تونده‌كانیش خزمه‌ت به‌چاره‌سه‌ركردنی كێشه‌كانی نێوان هه‌رێم و به‌غدا ناكات".

هه‌رێم كه‌مال ئاغا سه‌رۆكی فراكسیۆنی یه‌كێتی له‌ ئه‌نجومه‌نی نوێنه‌رانی عیراق به‌ وێبسایتی ره‌سمی یه‌كێتیی نیشتمانیی كوردستان  PUKMEDIA ی راگه‌یاند:" بڕ‌یاربوو ئه‌مڕ‌ۆ یه‌كشه‌ممه‌ 26-1-2025  تیمێكی هه‌رێمی كوردستان سه‌ردانی به‌غدا بكاته‌وه‌، به‌ڵام به‌هۆی ته‌واونه‌كردنی رێكاری یاسایی و هونه‌ری له‌لیستی خانه‌نشینان و هه‌ندێك بابه‌تی دیكه‌، كه‌  پێویستی به‌كاتی زیاتر هه‌بوو، سه‌ردانه‌كه‌ ئه‌نجام نه‌درا، به‌ڵام له‌م چه‌ند رۆژه‌دا سه‌ردان ده‌كه‌نه‌وه‌".

" لێدوانه‌ تونده‌كانی چه‌ند رۆژی رابردوو جێگای سه‌رسوڕ‌مان بوو، چونكه‌ هه‌موو كێشه‌ی ساڵی 2024 یه‌ك مووچه‌ بووه‌، ئه‌م لێدوانانه‌ خزمه‌ت به‌م قۆناغه‌ی ئێستا ناگه‌یه‌نێت و خزمه‌تی ئه‌و تیمه‌ش ناكات كه‌ ماوه‌یه‌كه‌ كاری باش ده‌كه‌ن، ئه‌وه‌ی كه‌ خزمه‌ت ده‌گه‌یه‌نێت ئه‌وه‌یه‌ كه‌ خۆمان له‌گه‌ڵ دۆخه‌كه‌ رێكبخه‌ین"، هه‌رێم كه‌مال ئاغا واده‌ڵێت.

ئاماژه‌ی به‌وه‌شكرد: " له‌دوو ساڵی رابردوودا سه‌رۆك بافڵ جه‌لال تاڵه‌بانی سه‌رۆكی یه‌كێتیی نیشتمانیی كوردستان ده‌یان گرێكوێره‌ی كردۆته‌وه‌، تیمی حكومه‌ت و په‌رله‌مانیش كاری باشیان كردووه‌، بۆ ئه‌وه‌ی چیدیكه‌ خه‌ڵكی هه‌رێمی كوردستان نه‌بێته‌ قوربانی سیاسه‌تی بێمووچه‌ كردن و برسیكردن".

 ئاماژه‌ی به‌وه‌شكرد: "ساڵی 2025 به‌هه‌ر شێوازێك بێت، نابێت وه‌ك رابردوو بێت، هه‌روه‌ها داهاتی نانه‌وتی هه‌رێمیش ده‌بێت چاره‌سه‌ر بكرێت و نابێت بكرێته‌ بیانوو بۆ نه‌ناردنی مووچه‌ و خه‌ڵكی كوردستان ببێته‌ قوربانی، بۆ ئه‌مه‌ش كاری باشكراوه‌و ده‌رئه‌نجامی باشیشی هه‌بووه‌".

له‌ كۆتایشدا سه‌رۆكی فراكسیۆنی یه‌كێتی وتی: "گرنگه‌ هه‌رێمی كوردستان له‌رووی سیستمی مووچه‌ و رێكه‌وتنه‌كانه‌وه‌ خۆی له‌گه‌ڵ حكومه‌تی فیدراڵی بگونجێنێت، هه‌روه‌ها یه‌كڕ‌یزی ماڵی كورد له‌ به‌غدا گرنگه‌و به‌هۆی یه‌كڕ‌یزییه‌وه‌ ده‌ستكه‌وتی باش  بۆ هه‌رێمی كوردستان به‌ده‌ستبهێنراوه‌، به‌تایبه‌ت ئه‌وه‌ی په‌یوه‌ست بوو به‌ گه‌ڕ‌اندنه‌وه‌ی ماڵ و موڵك بۆ خاوه‌نه‌كانیان له‌ناوچه‌جێناكۆكه‌كان".

PUKMEDIA