سەرۆککۆماری عیراق وسەدان سەرۆک و سەرکردەی وڵاتان لە داڤۆس دەبن

ئاژانسەکان

كۆڕبەندی ئابووری داڤۆس

 ئەمڕۆ كۆڕبەندی ئابووری داڤۆس 2025 لە  سویسرا دەستپێدەكات، د. لەتیف رەشید سەرۆكکۆماری عیراق بەشداری دەکات.

كۆڕبەندەكە 5 رۆژ بەردەوام دەبێت و بەپێی کارنامەکە چەندین تەوەری  سەرەكی لەخۆدەگرێت لەوانە ململانێكان لە رۆژهەڵاتی ناوەڕاست، دەستپێشخەری ئاگربەست لە غەززە، پێکهێنانی حكومەتی نوێی سوریا،  گۆڕانكارییە ژینگەییەکان و كەشوهەوا، رووداوی ئاگرەكەی ویلایەتی كالیفۆرنیا لەویلایەتە یەکگرتوەکان ئەمریكا.

لە راگەیەندراوێکی سەرۆکایەتی کۆمار کە کۆپییەکی بۆ PUKMEDIA نێردراوە تەئکید لە بەشداری  د.لەتیف جەمال رەشید سەرۆک کۆماری عیراق دەکات و دەڵێت:"ئەمڕۆ دووشەممە 20 ی کانوونی دووەمی 2025 بەرەو سویسرا بەڕێدەکەوێت بۆ بەشداریکردن لە کۆبوونەوەکانی کۆڕبەندی ئابووری جیهانی لە داڤۆس".

بەپێی زانیارییەکانی پێگەی رەسمی کۆربەندەکە  سەدان سەرۆک و سەرکردە و کەسایەتی لە جیهانەوە بەشدار دەبن،  هەروەها پێشبینی دەكرێت لەماوەی ئەو 5 رۆژەدا نزیکەی 3 هەزار کەس بەتایبەت بزنسمان و سەرمایەدار و وەبەرهێن لە 130 وڵاتی جیهان بەشداریی بکەن.

کۆڕبەندی ئابووری جیهانی لە داڤۆسی سویسرا کە رێكخراوێكی ناحكوومیی قازانج نەویستە و له ساڵی 1971 لەلایەن زانای بواری ئابووری "كلاوس شواب" دامەزراوە، زیاتر لە هەزار كۆمپانیای نێودەوڵەتی و فرەڕەگەز ئەندامن لەو كۆڕبەندە، گەورە بەرپرسانی كۆمپانیاكانی دنیا و سەركردە سیاسییەكان، ساڵانە لەو شارە كۆ دەبنەوە و گفتوگۆ لەسەر كێشە گەورەكانی ئابووری و سیاسەت لە دنیا دەكەن، هاوكات گرێبەست و پڕۆژەی ئابووریی هاوبەشی گەورە لە نێوان وڵاتان ئیمزا دەكرێت، ئامانجی ئەو كۆڕبەندە ئابووریی ئازاد و رەخساندنی ژینگەیەكی لەباری وەبەرهێنانە لە سەرتاسەری دنیا بۆ كۆمپانیاكان.


PUKMEDIA