دارایی هه‌رێم: عیراق زیاتر له‌ 800 ملیار دیناری مووچه‌ی نه‌ناردوه‌

PUKMEDIA

دراوی عیراقی

وەزارەتی دارایی حكومەتی هەرێمی كوردستان كۆی تەموویلی مووچەی هەرێمی لەلایەن وەزارەتی دارایی فیدراڵەوە بۆ ساڵی 2024 بڵاوكردەوە و رایگەیاند: "حكومەتی عیراق بڕی (822,642,015,037) دیناری لەمووچەی فەرمانبەران و خانەنشینانی هەرێم بۆ ساڵی  2024 لەلا ماوە".

لەڕاگەیەندراوێكی وەزارەتی دارایی حكومەتی هەرێمی كوردستان كەكۆپییەكی دەست PUKMEDIA كەوتووە راگەیەندراوە: "وەزارەتی دارایی فیدڕاڵ وەك خۆی بانگەشەی بۆ دەكات دادپەروەر نەبووەو پابەند نەبووە بە بڕیارەكانی دادگای فیدراڵی سەبارەت بە خەرجكردنی مووچەی فەرمانبەرانی هەرێم بەبێ بەربەست، بەپێی كەشفی حسابی وەزارەتمان لە بانكی ناوەندیی عیراق لقی هەرێم/ هەولێر، وەزارەتی دارایی عیراق بڕی تەنها (10,026,883,844,549) دیناری وەك شایستەی مووچوخۆرانی هەرێمی كوردستان بۆ ساڵی (2024) ناردووە".

ئاماژە بەوەشدراوە: "ئەمەش دوای ئەوەی بڕی (726,995,775,414) دیناری وەك لێبڕینی خانەنشینی و باجی داهات لەكۆی تەرخانكراوی هەرێم بڕیوە، لە كاتێكدا ئەو بڕە پارەیەی بۆ هەرێم تەرخان كراوە، بەپێی خشتەی (هـ) لە یاسای بوودجەی فیدراڵی بۆ ساڵی (2024)، بریتییە لە(11,576,521,335,000) دینار، بەمەش دەردەكەوێت هەرێمی كوردستان بڕی (822,642,015,037) دیناری لە تەرخانكراوی مووچەی فەرمانبەران و خانەنشینان بۆ ساڵی ( 2024) لەلای حكومەتی فیدراڵی ماوە".

PUKMEDIA