هەمواری خانەنشینی لە کارنامەی دانیشتنی سبەی نوینەراندا دەبێت

PUKMEDIA

هۆڵی کۆبوونەوەی ئەنجومەنی نوێنەرانی عیراق

بڕیارە سبەینێ‌ 12/1/2025 ئەنجومەنی نوێنەرانی عیراق  یەکەم کۆبوونەوەی ئەمساڵی بۆ هەمواركردنەوەی یاسای تەمەنی خانەنشینی كە لە 60 ساڵەوە بكرێتەوە بە 63 ساڵ ئەنجام بدات و بەپێی كارنامەش خوێندنەوە یەكەم بۆ پێشنیاری هەمواركردنەوەی یاسای خانەنشینی دەكرێت. 

هەروەک لە کارنامەکەدا هاتووە لەدانیشتنەکەدا خوێندنەوەی یەكەم بۆ پرۆژەیاسای رێكخستنەوەی خزمەتگوارییەكان دەكرێت، هەروەها بڕیارە رۆژی دووشەممەش 13-1-2025 ئەنجومەنی نوێنەران كۆببێتەوە بۆ گفتوگۆكردن و خوێندنەوەی چەند پرۆژەیاسایەك، بەپێی كارنامەكەش یەكێك لە تەوەرەكان گفتوگۆكردن و خوێندنەوەی دووەم دەبێت بۆ پرۆژەهەمواری یاسای بودجە بۆ ساڵی 2023 و 2024 و 2025.

د.نەرمین مەعروف ئەندامی لیژنەی دارایی لە ئەنجومەنی نوێنەرانی عیراق بە PUKMEDIA ی  رایگەیاند:" خاڵی سەرەكیی هەموارەكە تایبەتە بە تەمەنی خانەنشینی و  پێشنیارەكە بۆ ئەوەیە تەمەنی خانەنشینبوونی فەرمانبەران لە كەرتی گشتی بكرێتەوە بە 63 ساڵ كە ئێستا  بەهۆی هەمواری یەكەمی یاساكە لە ساڵی 2019 كراوەتە 60 ساڵ".

PUKMEDIA