ئەنجومەنی نوێنەران بڕیار لەسەر کۆمسیۆن دەدات

PUKMEDIA

لۆگۆی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق

سه‌ره‌تای هه‌فته‌ی ئاینده‌ كۆبونه‌وه‌كانی ئه‌نجومه‌نی نوێنه‌رانی عیراق ده‌ستپێده‌كاته‌وه‌و ئه‌ندامێكی ئه‌نجومه‌نی نوێنه‌رانیش ده‌ڵێت: "پێویسته‌ له‌سه‌ره‌تای دانیشتنه‌كانی ئه‌نجومه‌نه‌كه‌دا بڕ‌یار له‌ پرسی كۆتایی هاتنی ته‌مه‌نی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق بدرێت".

مه‌لا كه‌ریم شوكور ئه‌ندامی ئه‌نجومه‌نی نوێنه‌رانی عیراق له‌ فراكسیۆنی یه‌كێتی به‌ وێبسایتی ره‌سمی یه‌كێتی PUKMEDIA ی راگه‌یاند: "رۆژی 9-1-2025 وه‌رزی یه‌كه‌می ساڵی چواره‌می دانیشتنه‌كانی ئه‌نجومه‌نی نوێنه‌رانی عیراق ده‌ستپێده‌كاته‌وه‌و یه‌كه‌م پرسیش كه‌ده‌خرێته‌ به‌رنامه‌ی كاری دانیشتنه‌كانه‌وه‌ پرسی كۆتایی هاتنی ته‌مه‌نی كۆمسیۆنی باڵای سه‌ربه‌خۆی هه‌ڵبژاردنه‌كانی عیراقه‌".

"له‌ رۆژی 5-1-2025ه‌وه‌ ته‌مه‌نی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق دوای درێژكردنه‌وه‌ی بۆ ماوه‌ی 6 مانگی كۆتایی هاتوه‌و پێویسته‌ ئه‌نجومه‌نی نوێنه‌رانی عیراق بڕ‌یار له‌سه‌ر جارێكیتر درێژكردنه‌وه‌ی ته‌مه‌نی كۆمسیۆن بدات، یاخود چاره‌سه‌رێك بۆ ئه‌و پرسه‌ بدۆزێته‌وه‌"، مه‌لا كه‌ریم شوكور وای وت.

له‌گه‌ڵ ئه‌وه‌ی بڕ‌یاربوو رۆژی 5-1-2025 كه‌هاوكات بوو له‌گه‌ڵ كۆتایی هاتنی ته‌مه‌نی كۆمسیۆن، ئه‌نجومه‌نی نوێنه‌رانی عیراق كۆببێته‌وه‌و چاره‌سه‌رێك بۆ ئه‌و پرسه‌ بدۆزێته‌وه‌، به‌ڵام به‌هۆی ته‌واونه‌بوونی ژماره‌ی یاسایی ئاماده‌بونی په‌رله‌مانتارانه‌وه‌ دانیشتنه‌كه‌ بۆ سه‌ره‌تای هه‌فته‌ی داهاتوو دواخراو بڕیارە له‌گه‌ڵ ده‌ستپێكردنه‌وه‌ی دانیشتنه‌كان ئه‌و پرسه‌ بخرێته‌ كارنامه‌ی په‌رله‌مانه‌وه‌.

ئەمەش لەکاتێکدایە، بەمەبەستی بەڕێوەچوونی هەردوو هەڵبژاردنی ئەنجومەنی پارێزگاکانی عیراق و پەرلەمانی کوردستان دووجار تەمەنی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق درێژکرایەوە، لەڕۆژی 22-11-2023 بۆ ماوەی شەش مانگ و رۆژی 22-5-2024 بۆ ماوەی شەش مانگی دیکە.

PUKMEDIA