یادی پڕشکۆی شەهیدانی یەکێتی بەرزڕاگیرا

تایبەت

گردی شەهیدان

ئەمڕۆ شەممە ٢٣-١١-٢٠٢٤ بە ئامادەبوونی ژمارەیەکی زۆر لە کەسایەتی حزبی و حکومی و کەسوکاری سەربەرزی شەهیدان و هاوڕێ و هاوسەنگەرانیان لە گۆڕستانی شەهیدان لە گردی سەیوان یادی بەرزەفڕی شەهیدان بەرزڕاگیرا.

زیاد جەبار: خەبات و قوربانیدانی شەهیدانمان بۆ هەموو گەلی کوردستان بووە

لەمەراسیمەکەدا زیاد جەبار لێپرسراوی مەڵبەندی یەکی رێکخستنی سلێمانی وتارێکی بەناوی مەکتەبی شەهیدان و مەڵبەندی سلێمانییەوە پێشکەشکردو رایگەیاند:"ئەمڕۆ لێرەین یادی پڕشکۆی شەهیدانی یەکێتیی نیشتمانیی کوردستان بەرزڕابگرین، لەمێژووی حزبەکەماندا هەڵگیرسانەوەی شۆرشی نوێی گەلەکەمان بەڕابەرایەتی سەرۆک مام جەلال، خەبات و قوربانیدانی بۆ هەموو گەلی کوردستان بووە بەتایبەت بۆ کەرکوک و ناوچە دابڕێنراوەکان".

وتیشی:" ئەمڕۆ لەسەر ئەم مەزارە پیرۆزە یادی نزیکەی ٢٧ هەزار شەهید دەکەینەوە و پێیان دەڵێین ( نامرن ئەوانە وا لەدڵی میللەتدا دەژین)، حزبەکەمان تۆمارێکی زێڕین و درەوشاوەی لەدووتوێی لاپەڕەکانی مێژوودا نوسیوەتەوە، هەر ئەوەش وایکردووە یەکێتی لەهەموو حزبەکانی تر جیاوازتر بێت، لەم قۆناغە نوێیەی خەباتی یەکێتیشدا بەسەرۆکایەتی بافڵ جەلال تاڵەبانی کاری لەپێشینەمان پاراستنی خەڵکی هەرێمی کوردستانە و هیچ پاشەکشەیەک لەو بەڵێنانە ناکەین کە بەخەڵکمان داون".   

بەهۆی پشوو هاتنە پێشەوەی پرۆسەی سەرژمێری یادی رۆژی شەهیدی یەکێتی لەکاتی خۆیدا نەکراو دواخرا بۆ ئەمڕۆ.

21 ی تشرینی دووەمی هەموو ساڵێک رۆژی شەهدانی یەکێتییە و لەو رۆژەدا خاڵە شیهاب و هاوڕێکانی لە سێدارەدران کە سەرەتای دامەزراندنی شۆڕشی نوێ بوو وەک پۆلێکی سەرمەشق گیانیان بەختکردوو دروشمی (کەم بژی و کەڵ بژی) یان داهێنا.

بەگوێرەی تۆماری مەكتەبی شەهیدان و تێكۆشەرانی یەكێتیی نیشتمانیی كوردستان كە سایتی رەسمی یەكێتی PUKMEDIA وەریگرتوە، یەكێتی خاوەنی زیاتر لە 26 هەزار شەهیدە.

PUKMEDIA