خالید شوانی: سبەی هەموومان لە کەرکوک دەبین

PUKMEDIA

د. خالید شوانی

وەزیری دادی عیراق داوا لە کەرکوکییەکان دەکات بگەڕێنەوە کەرکوک و بۆ سەرژمێری لە کەرکوک خۆیان تۆمار بکەن و رایدەگەیەنێت: "هەموومان کەرکوکین و سبەی لە کەرکوک دەبین، ئێمەی کەرکوکی شانازی بە کەرکوکیبونی خۆمانەوە دەکەین".

د. خالید شوانی وەزیری دادی عیراق لەپەیامێکیدا لەبارەی سەرژمێری رایگەیاند: "هەموومان کەرکوکین و سبەی لە کەرکوک دەبین، ئێمەی کەرکوکی کە شانازی بە کەرکوکیبونی خۆمانەوە دەکەین، سبەینێ کە رۆژی سەرژمێرییە کاتی ئەوەیە ئەم شانازییە لەناو پەڕە و تۆمارەکانی ساڵی 2024 دا تۆمار بکەین، چۆن ئێمە شانازی دەکەین کە باوباپیرانمان لە سەرژمێری ساڵی 1957 لە کەرکوک تۆمار کراون و ئێمە کەرکوکی رەسەنین و خەڵکی شارەکەین، با نەوەکانی ئێمەش شانازیمان پێوە بکەن کەلەم سەرژمێرییە لە کەرکوک ناونوس دەکرێین".

"داواکارم لە کەرکوکییە بەڕێزەکان لەهەر جێگایەکن بگەنەوە شاری کەرکوک و سبەی لە سەرژمێری کەرکوک خۆیان ناونوس بکەن و لە داهاتووی شارەکە و داهاتووی نەوەکانمان زامن بکەن، هیوادارم هەموومان ئەمڕۆ هەتا ئێوارە لەکەرکوک بین و سبەینێ بە شانازییەوە لە کەرکوک خۆمان ناونوس بکەین"، د. خالید شوانی وای وت.

سبەینێ 2024-11-20 پرۆسەی سه‌رژمێری گشتی له‌ عیراق و هه‌رێمی كوردستان دەستپێدەکات و ماوەی دوو رۆژ دەخایەنێت، کە نزیکەی 40 ساڵە لە عیراق بەگشتی ئەو پرۆسەیە ئەنجام نەدراوە، بۆ ئەو مەبەستەش قەدەغەی هاتووچۆ لەسەرجەم ناوچەکانی عیراق و هەرێم تا سەعات 12:00شەوی 21لەسەر 22ی11  رادەگەیەنرێت و پێویستە هاووڵاتیان لەکاتی سەردانیکردنی بژمێرەکاندا ئامادەییان هەبێت و وەڵامی پرسیارەکانیان بدەنەوە.

PUKMEDIA