کارەبای سلێمانی دژی ناوزڕاندن و تەشهیر بەفەرمانبەرەکانی سکاڵا تۆماردەکات

ئەرشیف

لۆگۆی بەڕێوەبەرایەتی کارەبای سلێمانی

بەڕێوەبەرایەتی گشتی كارەبای سلێمانی سەبارەت بە بڵاوبوونەوەی دەنگۆیەک لەلایەن کەناڵێکی ئاسمانییەوە، دژی بەڕێوەبەرایەتییەکەیان روونکردنەوەیەک بڵاودەکاتەوە و رایدەگەیەنێت:" زانیارییەكانی ئەو كەناڵە پڕە لە هەڵە و ناوزڕاندن و تەشهیر بە فەرمانبەران و بەڕێوەبەرایەتیمان، بەوپێیەی راستەوخۆ ناوی فەرمانبەرەكان و پێگە و پلەكانیان دەهێنرێت، لێرەدا رایدەگەیەنین كە بابەتەكە هیچ پەیوەندی بە داهاتی كارەباوە نیە و هیچ بڕەپارەیەك لە داهاتی كارەبا نەدزراوە".

لەڕوونکردنەوەیەکدا کە وێنەیەکی بۆ PUKMEDIA نێردراوە، بەڕێوەبەرایەتی گشتی كارەبای سلێمانی رایگەیاندووە:" كەناڵێكی ئاسمانی بەشێوەیەكی چەواشەكارانە و بەرنامە بۆداڕێژراو لە پێناو لێدان لە شاری سلێمانی و دوور لە هەموو ئیتیكێكی رۆژنامەوانی، باس لە كەیسی دزینی دوو ملیار و 500 ملیۆن دیناردەكات لە رێگەی وەسڵی بەتاڵەوە لە بەڕێوەبەرایەتی گشتی كارەبای سلێمانی".

" زانیارییەكانی ئەو كەناڵە پڕە لە هەڵە و ناوزڕاندن و تەشهیر بە فەرمانبەران و بەڕێوەبەرایەتیمان، بەوپێیەی راستەوخۆ ناوی فەرمانبەرەكان و پێگە و پلەكانیان دەهێنرێت، لێرەدا رایدەگەیەنین كە بابەتەكە هیچ پەیوەندی بە داهاتی كارەباوە نیە و هیچ بڕەپارەیەك لە داهاتی كارەبا نەدزراوە، تەنها كەیسێك لە بەڕێوەبەرایەتی ژمێریاریی بەڕێوەبەرایەتی گشتیمان هەیە و  بە بڕیاری دادوەر چەند فەرمانبەرێك بانگكراون بۆ لێكۆڵینەوە و یەك فەرمانبەر راگیراوە و لیژنەیەكی لیكۆڵینەوەش پێكهێنراوە و وردبینی لە دۆسێكاندا دەكەن و تائیستا لێكۆڵینەوە و رێكارە یاساییەكان  بەردەوامەو، چاوپۆشیش لە هیچ فەرمانبەرێك ناكرێت لەكەیسەكە تێوەگلابێت"، لەڕوونکردنەوەکەدا هاتووە.

هەر لە روونکردنەوەکەدا ئاماژە بەوەشکراوە:"لە ئێستادا ئەم كەیسە ئاڕاستەی دادگای لێكۆڵینەوە كراوە و دادگا ئەو بابەتە یەكلادەكاتەوە، كە كێ تاوانبارە و كێش بێ تاوانە و بنەمایەكی یاساییش هەیە دەڵێت (المتهم بریء حتى تثبت إدانته) بۆیە بۆ هیچ كەس و لایەنێكی راگەیاندن نیە لە بری دادگا بڕیار بدات، هاوکات بەتۆمەتباركردنی بەڕێوەبەرایەتیەك و فەرمانبەرەكانی، سەبارەت بەم بابەتە  بە مافی خۆمانی دەزانین سكاڵای یاسایی لەسەر ئەو كەناڵە تۆماربكەین".

PUKMEDIA