کۆمسیۆن وەڵامی تانەی لایەنەکان دەداتەوە

PUKMEDIA

باڵەخانەی پەرلەمانی کوردستان، لۆگۆی کۆمسیۆنی باڵای هەڵبژاردنەکان

٤١ تانە له‌ئه‌نجامی كۆتایی هه‌ڵبژاردنی خولی شه‌شه‌می په‌رله‌مانی كوردستان دراوە، كه‌ رۆژی 30-10-2024 كۆمسیۆنی سه‌ربه‌خۆی هه‌ڵبژاردنه‌كانی عیراق به‌ ره‌سمی ده‌رگای تانه‌دانی راگه‌یاند، وته‌بێژی كۆمسیۆنیش ده‌ڵێت:" کۆمسیۆن لە کۆی ٤١ تانە وەڵامی ٢٨ تانەی ناردووە بۆ دەستەی دادوەری تا بڕیاریان لەسەر بدات، کاریش لەسەر ئەو تانانە دەکات کە ماون".

جومانه‌ غه‌لای وته‌بێژی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق له‌لێدوانێكی تایبه‌تدا به‌ وێبسایتی ره‌سمی یه‌كێتیی نیشتمانیی كوردستان PUKMEDIA  ی راگه‌یاند:" دوای کردنەوەی دەرگای تانە بەڕووی لایەنەکاندا لەلایەن کۆمسیۆنی عیراقەوە، تا ئێستا ٤١ تانە لەئەنجامی هەڵبژاردنی خولی شەشەمی پەرلەمانی کوردستان دراوە".

"لەئێستادا کۆمسیۆن لە کۆی ٤١ تانە وەڵامی ٢٨ تانەی ناردووە بۆ دەستەی دادوەری تا بڕیاریان لەسەر بدات، کاریش لەسەر ئەو تانانە دەکات کە ماون و لەماوەی ٧ رۆژدا وەڵامی سەرجەم تانەکان دەداتەوە"، جومانە غەلای وایوت.


بەپێی یاسای کۆمسیۆن لە دوای وەرگرتنی تانەکان لەماوەی سێ رۆژدا، ئەنجومەنی کۆمسیاران حەوت رۆژی لەبەردەمدایە بۆئەوەی تانەکان یەکلا بکاتەوە و وەڵامی تانەکان پێشکەش بە دەستەی دادوەری هەڵبژاردنەکان بکات، دواتریش دەستەی دادوەری هەڵبژاردن تانەکان لە ماوەی 10 رۆژی کارکردندا یەکلادەکاتەوە و دواتریش ئەنجومەنی کۆمسیاران ئەنجامی کۆتایی هەڵبژاردن پەسەند دەکات.

رۆژی 20ـی 10ـی 2024 هەڵبژاردنی خولی شەشەمی پەرلەمانی کوردستان لە بازنەکانی هەولێر، سلێمانی، دهۆک و هەڵەبجە بەڕێوەچوو، تێیدا یەکێتیی نیشتمانیی کوردستان توانی 409 هەزار و 548 دەنگی بەدەستهێنا و 23 کورسی پەرلەمانی مسۆگەر کرد.

PUKMEDIA