بەتیروپشك لەسلێمانی زەوی بەكەسوكاری شەهیدان دەدرێت

PUKMEDIA

سەرۆكایەتی شارەوانی سلێمانی

لەسلێمانی تیروپشكی دابەشكردنی زەوی بەسەر 500 خێزانی كەسوكاری شەهیداندا كراو بەڕێوەبەری گشتیی كاروباری شەهیدان و ئەنفالكراوانی سلێمانیش رایگەیاند: "دابەشكردنی زەوییەكان بەتیروپشك و خاڵبەندی بووەو  ئەو كەسانەی گرتووەتەوە كەپێشتر فەرمانی ئەنجومەنی وەزیرانیان بۆ دەركراوە، بەڵام بەهۆی نەبوونی زەوییەوە، تائێستا وەریان نەگرتووە".

ئەدیب لەتیف بەڕێوەبەری گشتی كاروباری شەهیدان و ئەنفالكراوانی سلێمانی بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: "پاش تەواوكردنی ئامادەكارییەكان و رێكخستنی ناوەكان، ئەمڕۆ پێنج شەممە، 7-11-2024، تیروپشكمان بۆ ناوی كەسوكاری ئەو شەهیدانە كرد كەپێشتر فەرمانی ئەنجومەنی وەزیرانیان بۆ دەركراوە، بەڵام بەهۆی نەبوونی زەوییەوە، تائێستا وەریان نەگرتووە".

"سەرۆكایەتی شارەوانی سلێمانی زەوییەكانی ئامادەكردووەو هەموو ئەو كەسوكاری شەهیدانەی ناویان لەلیستەكەدا هەبوو لەوەرگرتنی زەوی سوودمەند بوون" ئەدیب لەتیف وایوت.

لە بەڕێوەبەرایەتیی گشتی شەهیدان و ئەنفالكراوانی سلێمانی 43 هەزار مووچەخۆر هەن، تائێستا 22 هەزار پارچە زەوی بەكەسوكاری شەهیدان و زیندانیانی سیاسیی دراوەو لە مانگی 3ی ئەمساڵ 2024 ئەنجومەنی وەزیرانی هەرێم بڕیاریدا زەوی بەسەر فەرمانبەرو خانەنشیناندا دابەشبكرێت بەمەرجێك پێشتر سوودمەند نەبووبن.

PUKMEDIA