شێخ جەعفەر: خەڵکی هەرێم گۆڕانکاری حکومڕانییان دەوێت

PUKMEDIA

شێخ جەعفەر شێخ مستەفا لێپرسرای ئەنجومەنی پاراستنی بەرژەوەندییە باڵاکانی یەکێتی

خەڵکی هەرێمی کوردستان گۆڕانکاری حکومڕانییان دەوێت و لێپرسرای ئەنجومەنی پاراستنی بەرژەوەندییە باڵاکانی یەکێتیش دەڵێت: "ئەو گۆڕانکاری و چاکسازییە تەنها بە یەکێتیی نیشتمانیی کوردستان دەکرێت، بۆیە گرنگە هاووڵاتیان لەم هەڵبژاردنەدا دەنگ بە لیستی ١٢٩ـی یەکێتی بدەن".

شێخ جەعفەر شێخ مستەفا لێپرسرای ئەنجومەنی پاراستنی بەرژەوەندییە باڵاکانی یەکێتیی نیشتمانیی کوردستان لە کۆبوونەوەیەکی رێکخراوەییدا لەگەڵ ژمارەیەک کادری یەکێتی رایگەید: "ئەگەر شەفافییەت هەبووایە کێشەکانمان لەناو خۆماندا چارەسەر بکردایە هەرگیز هەڵبژاردن دوانەدەخراو بارودۆخی هەرێمیش نەدەگەیشتە ئەم دۆخەی کە لە ئێستادا هەیە".

"خەڵکی هەرێمی کوردستان بەگشتی لە زاخۆ تا خانەقین گۆڕانکارییان دەوێت لە حکومڕانی، ئێمەش وەک یەکێتیی نیشتمانیی کوردستان رێز لەو داوایەیان دەگرین و داوایان لێدەکەین دەنگ بە یەکێتیی نیشتمانیی کوردستان بدەن، چونکە لەم بارودۆخەدا گۆڕانکاری تەنها بە یەکێتیی نیشتمانیی کوردستان دەکرێت"، شێخ جەعفەر وای وت.

ئاماژەی بەوەشدا: "لە کابینەی پێشووتردا بەهۆی ئەوەی یەکێتیی نیشتمانیی کوردستان ژمارەیەکی کەم پەرلەمانتاری لە پەرلەمانی کوردستان هەبوو، نەیدەتوانی وەک پێویست یاساکان لەبەرژەوەندی خەڵکی هەرێمی کوردستان تێپەڕێنێت، چونکە لایەنێک کە زۆرینەی پەرلەمان بوو، رێگر بوون و لە بەرژەوەندی خۆیان یاساکانیان تێدەپەڕاند، بۆیە گرنگە لەم هەڵبژاردنەدا خەڵک دەنگ بدات بە یەکێتیی نیشتمانیی کوردستان بۆئەوەی زۆرینەی پەرلەمان پێکبهێنێت و پۆستی سەرۆکی حکومەتیش بگرێتە دەست، بۆئەوەی لەو رێگایەوە ژیانێکی شایستە بۆ هاووڵاتیان دەستەبەر بکات".
PUKMEDIA