مەڵبەندی 3ی هەولێر: بەدەنگی دلێری هەولێرییەكان كۆتایی بەتاكڕەوی دەهێنین

PUKMEDIA

هەولێر

مەڵبەندی 3 ی هەولێری یەكێتیی نیشتمانیی كوردستان لە پەیامی ئەمڕۆی هەولێردا رایدەگەیەنێت: "بەهۆی بێ باكی دەسەڵاتی خۆسەپێن، هەولێر بەهەموو بارێك هەر دەخنكێت، ئیدارەی شارەكەش هیچ هەنگاوێك نانێت ئەگەر پارە نەچێتە گیرفانیان، بۆیە بە دەنگی دلێری هەولێرییەكان تۆڵەی ئەم هەموو جەرگ سووتانی دایكان و باوكان دەكەینەوەو كۆتایی بەحوكمی تاكڕەوانە دەهێنین" .

دەقی پەیامەكە:

پەیامی ئەمڕۆی هەولێر .

وەرزی بێ ئاویمان تێپەڕاند، ئێستا بەرەو وەرزی لافاو دەڕۆین .

بەهۆی بێ باكی دەسەڵاتی خۆسەپێن، هەولێر بەهەموو بارێك هەر دەخنكێت .
هاوینان نەبوونی ئاو و زستانانیش لافاو (سار دوازدی مانگیش) دوكەڵی ژەهراوی، سەربار و بن بار  ئەویش هەر خنكاندنە .

ئیدارەی هەولێر هیچ هەنگاوێك نانێت ئەگەر پارە نەچێتە گیرفانیان، ئاوی گەڕەكەكانی هەولێریان داوەتە شوققەو باڵەخانەكانی خۆیان، ئەو ئاوەی كە هەیە، ئێ هەر بەشی  مەلەوانگەو دەریاچە دەستكردەكانی خۆیان دەكات، بۆیە هەولێر هاوینان لەبێ ئاوی خنكاوە .

لەچەند ساڵی رابردوودا دەسەڵاتی خۆسەپێن، بەگژ دارو بەردو سروشتی هەولێردا چوون و دەیانگوت تەواو باران وەكو جاران نابارێت، بۆیە هەرچی بەست و ڕێڕەوی ئاوی باران بوو كردیان بەخانوو و شوققەو هەموو رێگەیەكیان لەباراناو گرت و تەوژمی لافاوەكەشیان بەرەو گەڕەكانی هەولێر بردو بەو هۆیەوە هەردوو جوانەمەرگ (دانەر)ی 10 مانگان و (گەنجۆ نامیق)ی بیست ساڵان كەپیشەی شوان بوو، خۆی مەڕەكانی لەدارەتو لافاو بردنی و دوای شەش مانگ تەرمی پیرۆزیان لەقوشتەپە دۆزرایەوە .

بەدەنگی خەڵكی زوڵملێكراو دەنگی دلێری هەولێرییەكان تۆڵەی ئەم هەموو جەرگ سووتانی دایكان و باوكانتان لێ دەكەینەوەو كۆتایی بەحوكمی تاكڕەوانەتان دێنین .

یەكێتیی نیشتمانیی كوردستان
راگەیاندنی مەڵبەندی 3 ی هەولێر

PUKMEDIA