لیستی ١٢٩: كۆتایی پێدەهێنین

PUKMEDIA

لیستی ١٢٩ـی یەکێتیی نیشتمانیی کوردستان

یەكێتیی نیشتمانیی كوردستان بۆ داهاتووی كوردستان دەیەوێت كۆتایی بە خاك فرۆشتن و جیاكاری و گیرفان پڕكردن و كپكردنی دەنگی ئازادو گاڵتەكردن بەژیان و قوتی هاووڵاتیان و مووچەخۆران بهێنێت، بۆ ئەمەش بەدروشمی (كۆتایی پێدەهێنین.)، بەلیستی ١٢٩، بەشداری هەڵبژاردنی پەرلەمانی كوردستان دەكات.

یەكێتی كۆتایی بەكێشەكان دەهێنێت و دەیانگۆڕێت بەخزمەت

هانا شوان كاندیدی ژمارە ١٢ لەسەر لیستی ١٢٩ ی یەكێتیی نیشتمانیی كوردستان بۆ پەرلەمانی كوردستان لەبازنەی سلێمانی بە وێبسایتی رەسمی یەكێتی PUKMEDIA ی رایگەیاند: "لە لۆگۆی یەكێتیی نیشتمانیی كوردستاندا نوسراوە (ئاشتی، دیموكراسی، مافی مرۆڤ و چارەی خۆنوسین)، بۆیە هەر كردارو بۆچوونێك دژی ئەو دروشمانەبێت كە لەلۆگۆكەماندا هەن، ئێمە كۆتایی پێدەهێنین، چونكە دروشمەكانمان بنەمای جیهانین و لەجیهانیشدا بۆ خزمەتی هاووڵاتیانن".

"یەكێتیی نیشتمانیی كوردستان بڕوای تەواوی بەدیموكراسی و مافی مرۆڤ و ئازادی رادەربڕین هەیەو دابینكردنی زەمینەی ژیانێكی ئازادانەو شكۆمەندانە بۆ هاووڵاتیانی هەرێم ئەركی یەكێتییەو شەڕی بۆ دەكات، بۆیە بڕیارمانداوە لەم هەڵبژاردنەدا كێشەكان لە هەرێمی كوردستان بگۆڕین بۆ خزمەتكردن" هانا شوان وایوت.

دروشمی یەكێتی خاك فرۆشان توڕە دەكات

كۆتایی پێدەهێنین.، كە دروشمی لیستی ١٢٩ ی یەكێتییە بۆ هەڵبژاردنی داهاتووی پەرلەمانی كوردستان، خاك فرۆشان و گیرفان پڕكەرانی توڕە كردووەو كاندیدێكی یەكێتیش دەڵێت: "دژی گەندەڵكاران و جیاكاران دەوەستینەوە".


پەرێز عومەر كاندیدی ژمارە ٦ لەسەر لیستی ١٢٩ ی یەكێتیی نیشتمانیی كوردستان بۆ هەڵبژاردنی پەرلەمانی كوردستان لە بازنەی هەولێر بە وێبسایتی رەسمی یەكێتی PUKMEDIA ی راگەیاند: "یەكێتیی نیشتمانیی كوردستان لەم هەڵبژاردنەدا كۆتایی بە خاكفرۆشتن و گیرفان پڕكردن و جیاكاری لە هەرێم دەهێنێت، هەر ئەمەشە لایەنێكی لەهەرێم توڕە كردووە".

"جیاكاری لەم كابینەیەدا بەشێوەیەكە تەنها رەنگدانەوەی لەنێوان شارەكاندا نییە، بەڵكو لەناو خودی هەولێریش جیاكاری هەیەو گەڕەكە هەژارنشینەكان پشتگوێخراون، بۆیە یەكێتی دژی ئەم جیاكارییە دەوەستێتەوە" پەرێز عومەر وادەڵێت.

یەكێتی كۆتایی بەكپكردنی دەنگی ئازاد دەهێنێت

بەڕێوەبردنی حكومەت بە ئەقڵییەتی حزبی، كوردستانی روبەڕووی شكست كردووەتەوەو بۆ كۆتایی هێنان بەم ئەقڵییەتە، پێویستە یەكێتی سەركەوێت، تاوەكو لەوڕێگەیەوە باڵانسی هێز بۆ هەرێم بگەڕێتەوەو كۆتایی بەحكومەتێكی چەقبەستووی شكستخواردوو بهێنرێت.

عەلی مستەفا كاندیدی ژمارە ١ لەسەر لیستی ١٢٩ ی یەكێتیی نیشتمانیی كوردستان بۆ هەڵبژاردنی پەرلەمانی كوردستان لەبازنەی دهۆك بەوێبسایتی رەسمی یەكێتی PUKMEDIA ی راگەیاند: "یەكێتیی نیشتمانیی كوردستان دەیەوێت كۆتایی بەپێشێلكردنی مافی مرۆڤ و كپكردنی دەنگی ئازاد بهێنێت، كەلەپارێزگای دهۆك رەنگدانەوەی زۆری هەیەو چەندین كەس بەتۆمەتی بێ بنەما لەزینداندان".

"یەكێتیی نیشتمانیی كوردستان كۆتایی بەپێشێلكردنی مافی مووچەخۆران و سیاسەتی برسیكردنی هاووڵاتیان دەهێنێت، بۆیە گرنگە دەنگ بدەین بە كاندیدەكانی یەكێتی لەپێناو ژیانێكی باشترو خزمەتگوزار بۆ هەمووان" عەلی مستەفا وادەڵێت.

بڕیارە رۆژی ٢٠-١٠-٢٠٢٤، هەڵبژاردن بۆ خولی شەشەمی پەرلەمانی كوردستان بەڕێوەبچێت، یەكێتیی نیشتمانیی كوردستانیش بە دروشمی (كۆتایی پێدەهێنین.) و بەلیستی ١٢٩ و بە ١٧٢ كاندیدەوە كەبەسەر چوار بازنەدا دابەشبوون بەشداری هەڵبژاردن دەكات.

PUKMEDIA