د.لەتیف رەشید: گۆڕانی كەشوهەوا هەڕەشەیە لەئاسایشی ئاو و خۆراك

نوسینگەی راگەیاندنی سەرۆكایەتی كۆمار

د. لەتیف جەمال رەشید سەرۆككۆماری عیراق

د. لەتیف جەمال رەشید سەرۆككۆماری عیراق رایدەگەیەنێت: "گۆڕانی كەشوهەوا راستەوخۆ كاریگەری لەسەر ئاسایشی تەندروستی تەواوی عیراقیەكان و سەقامگیری وڵات و كۆمەڵگەكان هەیە، تێكچوونی كەشوهەوا هەڕەشەیە بۆسەر ئاسایشی ئاو  و خۆراك".

د. لەتیف جەمال رەشید رۆژی 22/9/2024  بەشداری لەچالاكییەكانی یەكەمین كۆنفرانسی نێودەوڵەتی تایبەت بەگۆڕانی كەشوهەواو كاریگەرییەكانیان لەسەر ئاسایشی تەندروستی لە عیراق كردو لە راگەیەندراوێكی ئۆفیسی رۆژنامەوانی كە وێنەیەكی بۆ PUKMEDIA نێردراوە  دەڵێت: " لە سەردەمی ئێستادا گۆڕانكاری لە كەشوهەوا بە یەكێك لەگرنگترین ئاستەنگەكانی بەردەم مرۆڤایەتی دادەنرێت، بەوپێیەی نەك هەر ئاستەنگی ژینگەیی، بەڵكو راستەوخۆ كاریگەری لەسەر ئاسایشی تەندروستی گەلان  و سەقامگیری وڵات و كۆمەڵگەكان هەیە".

 لەوتەیەكیدا سەرۆككۆماری عیراق باسی لە تێكچونی ژینگە و بەرزبوونەوەی پلەكانی گەرماو كەمبونەوەی سەرچاوە ئاوییەكان كردو وتی: "هەموو ئەمانە  هۆكاری بڵاوبوونەوەی نەخۆشییەكان و زیادبوونی فشار لەسەر سیستمی چاودێری تەندروستی و هەڕەشە لە ئاسایشی خۆراك و ئاو، بۆیە لەسەر ئاستی حكومەتی فیدڕاڵی و هەرێمی كوردستان پابەندین بەهاوكاری لەگەڵ هاوبەشەكانیان لەكۆمەڵگەی نێودەوڵەتی بۆ گەڕان بەدوای رێگەچارەی بەردەوام و كاریگەر بۆ روبەڕوبوونەوەی ئەو ئاڵنگاریانە".
 
د. لەتیف جەمال رەشید باسی لەوەشكرد، ئەو كۆنفرانسە وەك سەكۆیەكە بۆ ئاڵوگۆڕی ئەزمونەكان و پەرەپێدانی ستراتیژەكان كەبەشدارن لەبەهێزكردنی ئاسایشی تەندروستی لە وڵاتەكە و هەمو ناوچەكەدا.

PUKMEDIA