فراكسیۆنی یەكێتی داوای هاوتاكردنی مووچەی پێشمەرگە دێرینەكان و كەمئەندامانی سەنگەر دەكات

نوسینگەی راگەیاندنی پەرلەمانتار بەدریە حسێن

پێشوازی لیژنەی دارایی لە وەفدی كۆمەڵەی پێشمەرگە دێرینەكان و كۆمەڵەی كەمئەندامانی سەنگەر

فراكسیۆنی یەكێتی لەئەنجومەنی نوێنەران هەوڵی هاوتاكردنی موچەی پێشمەرگە دێرینەكان و كەمئەندامانی سەنگەر لەگەڵ حكومەتی فیدراڵ دەدات و ئەندامانی فراكسیۆنەكەش رایدەگەیەنن: "پشتیوانی داواكەیان دەبین و مافی خۆیانە موچەی پێشمەرگە دێرینەكان و كەمئەندامانی سەنگەر كەدەخرێتە سەر بەغدا هاوتا بكرێن".

پێشمەرگە دێرینەكان و كەمئەندامانی سەنگەر سەردانی لیژنەی دارایی دەكەن

د. نەرمین مەعروف ئەندامی فراكسیۆنی یەكێتی لەئەنجومەنی نوێنەرانی عیراق بە وێبسایتی رەسمی یەكێتیی نیشتمانیی كوردستان  PUKMEDIA رایگەیاند: "لیژنەی دارایی پێشوازی لە وەفدی كۆمەڵەی پێشمەرگە دێرینەكان و كۆمەڵەی كەمئەندامانی سەنگەر كرد، كە بەمەبەستی هاوتاكردنی موچەی هێزەكانی پێشمەرگەو خانەنشینانی پێشمەرگە دێرینەكان و كەمئەندامانی سەنگەر سەردانی لیژنەكەیان كردبوو".

راشیگەیاند: "پشتیوانی لەداواكەیان دەكەین و مافی خۆیانە موچەكانیان هاوتای هێزە ئەمنییەكان و خانەنشینانی عیراق بكرێن".

وەزارەتی كۆچ پشتیوانی داواكەی پێشمەرگە دێرینەكان و كەمئەندامانی سەنگەر دەكات

فراكسیۆنی یەكێتی جەخت لەوە دەكاتەوە ئەو پێشمەرگانەی كە پێش ساڵی 1991 ئاوارەبوون و لەدوای راپەرین گەڕ‌اونەتەوە بۆ كوردستان، بتوانن سوودمەندبن لەوەرگرتنی مووچەو ئیمتیازات و وەرگرتنی پارچە زەوی هاوشێوەی ئەو ئاوارانەی كەلە ساڵی 2003 گەڕ‌انەوە بۆ ناوچەكانی خۆیان لە خواروو وناوەڕ‌استی عیراق، بۆ ئەومەبەستەش وەفدەكە پشتیوانی وەزیری كۆچ و كۆچبەرانی بۆ داوا رەواكانی پێشمەرگە دێرینەكان و كەمئەندامانی سەنگەر بەدەستهێناوە.

هەر لەو بارەیەوە بەدریە حسێن ئەندامی فراكسیۆنی یەكێتی لە ئەنجومەنی نوێنەرانی عیراق لەلێدوانێكیدا بە وێبسایتی رەسمی یەكێتیی نیشتمانیی كوردستان  PUKMEDIA راگەیاند:" پشتیوانی داوای وەفدەكەی پێشمەرگە دێرینەكان و كەمئەندامانی سەنگەر دەبین و لەوچوارچێوەیەشدا سەردانی وەزیری كۆچ و كۆچبەرانی عیراقمان كردو ئامادەیی خۆی دەربڕ‌ی بۆ پشتیوانی لەداوا رەواكانی پێشمەرگە دێرینەكان و كەمئەندامانی سەنگەر".

"گفتوگۆمان لەبارەی هەمواركردنەوەی یاسای وەزارەتی كۆچ و كۆچبەرانی عیراق ژمارە 21 بۆ ساڵی 2009 كردو جەختكرایەوە لە زیادكردنی بڕ‌گەیەك بۆ هەمواری یاساكە بۆ ئەوە پێشمەرگە كەپێش ساڵی 1991 ئاوارەبوون و لەدوای راپەرین گەڕ‌انەوە بۆ كوردستان، یاساكە بیانگرێتەوەو بتوانن سوودمەندبن لەوەرگرتنی مووچەو ئیمتیازات و وەرگرتنی پارچە زەوی هاوشێوەی ئەو ئاوارانەی كەلە ساڵی 2003 گەڕ‌انەوە بۆ ناوچەكانی خۆیان لە خواروو وناوەڕ‌استی عیراق". بەدریە حسێن وادەڵێت.

رونیشیكردەوە: "لەڕ‌ۆژانی داهاتوو بەمەبەستی زامنكردنی مافی كەمئەندامانی سەنگەر بڕ‌یارە سەردانی وەزیری كارو كاروباری كۆمەڵایەتی بكەین، هەروەها بۆ جێگیركردنی مافی پێشمەرگە دێرینەكان سەردانی وەزارەتەكانی دارایی و بەرگری دەكەین و فراكسیۆنی یەكیتی هەموو هەوڵێك بۆ زامنكردن و هاوكاری و بەدواداچوون بۆ مافی پێشمەرگە دێرینەكان و كەمئەندامانی سەنگەر لەدامودەزگاكانی حكومەتی فیدڕ‌اڵ دەدەین".

فراكسیۆنی یەكێتی: مافی پێشمەرگە دێرینەكان و كەمئەندامانی سەنگەر پارێزراوبێت

ماوەی دوو رۆژە وەفدێكی پێشمەرگە دێرینەكان و كەمئەندامانی سەنگەر لەهەرێمی كوردستان بۆ مەبەستی هاوتاكردنی مووچەكانیان لەگەڵ عیراق و سوودمەندبوون لە ئیمتیازاتەكان سەردانی بەغدایان كردوەو لەو چوارشێوەیەشدا لەگەڵ فڕ‌اكسۆنی یەكێتی و وەزیری كۆچ و كۆچبەرانی عیراق كۆبوونەوەو هەردوو لا پشتیوانی خۆیان بۆ داواكەیان دەربڕی و بڕیاریشە لەرۆژانی داهاتوودا لەگەڵ لایەنە پەیوەندییدارەكان لەسە رهەمان بەمەبەشت كۆببنەوە.

وەفدەكە پێكهاتبوو لە جەمیل هەورامی سەرۆكی كۆمەڵەی پێشمەرگە دێرینەكان و فەریقی یەكەم جەبار یاوەر ئەمینداری پێشووی وەزارەتی پێشمەرگە و فوئاد ئەبابەكر سەرۆكی كۆمەڵەی كەمئەندامانی سەنگەر و عوسمان سێدەری ئەندامی ئەنجوومەنی باڵای پێشمەرگە دێرینەكان.

PUKMEDIA