كۆمسیۆن: تاقیكردنه‌وه‌ی ئامێره‌كانی هه‌ڵبژاردن سه‌ركه‌وتوو بوو

PUKMEDIA

کۆمسیۆن و پەرلەمانی کوردستان

کۆمسیۆنی باڵای سەربەخۆی هەڵبژاردنەکانی عیراق ئامێرەکانی دەنگدانی خولی شەشەمی پەرلەمانی کوردستانی لەهەر چوار پارێزگاکەی هەرێمی کوردستان تاقیکردەوەو بەڕێوەبەری نوسینگەی سلێمانی کۆمسیۆنی باڵای سەربەخۆی هەڵبژاردنەکانیش دەڵێت: "پرۆسەکە بەسەرکەوتووی ئەنجامدرا و هیچ گرفتێک لە ئامێرەکانی هەڵبژاردندا رووینەداوە".

هاوکات سه‌رۆكی كۆمسیۆنی سه‌ربه‌خۆی هه‌ڵبژاردنه‌كانی عێراقیش ده‌ڵێت: "ئامانجی تاقیكردنه‌وه‌ی ئامێره‌كانی ده‌نگدان گه‌یشتنه‌ به‌ به‌رزترین ئاستی ئاماده‌بوون بۆ هه‌ڵبژاردنی په‌رله‌مانی كوردستان و پێداگرین لە جێبەجێکردنی ئەرکەکانمان لەپێناو سەرکەوتنی بەڕێوەبردنی پرۆسەکە".

سەرجەم ئامێرەکانی دەنگدان بەسەرکەوتووی تاقیکرانەوەو هیچ کێشەیەکیان نەبووە

عومه‌ر ئه‌حمه‌د سه‌رۆكی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق له‌كۆنگره‌یه‌كی رۆژنامه‌وانیدا رایگه‌یاند: "كۆمیسیۆن پێداگره‌ له‌سه‌ر جێبه‌جێكردنی سه‌رجه‌م بڕ‌گه‌كانی خشته‌ و پرۆگرامی زه‌مه‌نیی پڕ‌ۆسه‌ی هه‌ڵبژاردن له‌كاتی خۆیدا".

وتیشی:" له‌ پڕ‌ۆسه‌كه‌دا سه‌رجه‌م ئامێره‌كانی هه‌ڵبژاردن وه‌كو ئامێره‌كانی پشتڕ‌استكردنه‌وه‌ی ده‌نگه‌كان، ژماردنی ده‌نگه‌كان و جیاكردنه‌وه‌ و ناردنی ئه‌نجامه‌كان بۆ به‌غدا تاقی ده‌كرێنه‌وه‌و ئامانج له‌ تاقیكردنه‌وه‌كه‌، دڵنیابوونه‌وه‌یه‌ له‌ توانای ئامێره‌كانی ده‌نگدان و گه‌یشتنه‌ به‌ به‌رزترین ئاستی ئاماده‌بوون بۆ به‌ڕ‌ێوه‌بردنی هه‌ڵبژاردنی تایبه‌ت و گشتیی په‌رله‌مانی كوردستان".

پڕ‌ۆسه‌ی تاقیكردنه‌وه‌كه‌ به‌ چاودێریی كۆمپانیایه‌كی پشكنینی ئه‌ڵمانی و ئاماده‌بوونی نوێنه‌ری یۆنامی، له‌ سه‌رجه‌م ناوه‌نده‌كانی ده‌نگدان له‌ پارێزگاكانی هه‌رێمی كوردستان كرا.

سه‌رۆكی كۆمیسیۆنی هه‌ڵبژاردن راشیگه‌یاند: "بۆ به‌ڕ‌ێوه‌بردنی هه‌ڵبژاردنی په‌رله‌مانی كوردستان، به‌ ته‌واوی ئاماده‌ین و توانای ئه‌وه‌مان ده‌بێت له‌ 24 سەعاتدا ئه‌نجامی هه‌ڵبژاردنه‌كه‌ رابگه‌یێنین".

لە 79 بنکە و ئۆفیسی سەرەکی پرۆسەکە بەرێوەچوو

له‌ چوارچێوه‌ی ئاماده‌كارییه‌كانی كۆمیسۆنی باڵای سه‌ربه‌خۆی هه‌ڵبژاردنه‌كانی عێراق بۆ هه‌ڵبژاردنی خولی شه‌شه‌می په‌رله‌مانی كوردستان، ئه‌مڕ‌ۆ دووشه‌ممه‌ 12-08-2024 ئامێره‌كانی ده‌نگدان له‌هه‌ر چوار پارێزگاكه‌ی هه‌رێمی كوردستان تاقیكرانه‌وه‌.

لەو بارەیەوە ئامانج عەزیز بەڕێوەبەری نوسینگەی سلێمانی کۆمسیۆنی باڵای سەربەخۆی هەڵبژاردنەکانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "پڕ‌ۆسه‌ی تاقیكردنه‌وه‌ی ئامێره‌كانی ده‌نگدان تاوه‌كو سەعات 12:30ـی ئه‌مڕ‌ۆ به‌رده‌وام بوو، هیچ گرفتێك له‌ ئامێره‌كاندا نه‌بینراوه‌ و سه‌رجه‌میان كار ده‌كه‌ن و ئەنجامەکان بەسەرکەوتووی رەوانەی ناوەندی سەرەکی لەبەغدا کرا".

"بەهەمان شێوەی دەنگدانی گشتی تاقیکردنەوەی ئامێرەکانی دەنگدانی تایبەتیش هیچ گرفتێکیان نەبووەو پرۆسەکە بەچاودێری نوێنەری لایەنە سیاسییەکان و رێکخراوەکانی تایبەت بە پرۆسەی هەڵبژاردن لە سلێمانی بەڕێوەچوو، کە لە 79 بنکەی دەنگدان پرۆسەی دەنگدانی گشتی و لە ئۆفیسی سەرەکی کۆمسیۆن لە سلێمانی ئەنجامدراو سەرکەوتووبوو"، ئامانج عەزیز وای وت.

بەپێی زانیارییەکانی PUKMEDIA پرۆسەی تاقیکردنەوەی ئامێرەکانی هەڵبژاردن، کەئەمڕۆ لەهەر چوار بازنەکەی هەرێم بەڕێوەچوو، لەسەرجەمیان بێ گرفت بەسەرکەوتووی پرۆسەکە ئەنجامدرا و هیچ گرفتێک بۆ ئامێرەکانی دەنگدان دروست نەبوو.

تا وادەی دەنگدان دوو جاری دیکە ئامێرەکان تاقیدەکرێنەوە

بەڕێوەبەری نوسینگەی سلێمانی کۆمسیۆنی باڵای سەربەخۆی هەڵبژاردنەکانی عیراق راشیگەیاند: "بڕیارە هەتا رۆژی هەڵبژاردن دوو جاری دیکە لە رۆژی 25-8-2024 و لە مانگی ئەیلولدا تاقیکردنەوە بۆ ئامێرەکانی هەڵبژاردن ئەنجامبدرێت، هاوکات پرۆسەی دابەشكردنەوەی کارتی دەنگدان لە سلێمانی بەردەوامی هەیە و لەبازنەی سلێمانی تەنها هەزار و 600 کارتی دەنگدان ماوە کە دروستبکرێن و بدرێنەوە بە هاوڵاتیان".


ئەمەش لەکاتێکدایە، بڕ‌یاره‌ رۆژی 20ـی تشرینی یه‌كه‌می ئه‌م ساڵ هه‌ڵبژاردنی خولی شه‌شه‌می په‌رله‌مانی كوردستان ئەنجامبدرێت، کەلەلایەن کۆمسیۆنی باڵای سەربەخۆی هەڵبژاردنەکانی عیراقەوە 69 ملیار و 230 ملیۆن دیناری بۆ ته‌رخانكراوه‌.

PUKMEDIA