کۆمسیۆن وادەی ناوتۆمارکردنی حزب و هاوپەیمانێتی و کاندیدەکان درێژدەکاتەوە

PUKMEDIA

هەڵبژاردن

هەرچەندە بڕیاربوو کە ئەمڕۆ 27-6-2024 کۆتایی بە ناوتۆمارکردنی حزب و هاوپەیمانێتی و کاندیدەکان بهێنرێت، بەڵام لەلایەن کۆمسیۆنەوە وادەکە بۆ 4-7-2024 درێژکرایەوە، ئەمەش لەکاتێکدایە كۆمسیۆنی باڵای سه‌ربه‌خۆی هه‌ڵبژاردنه‌كانی عیراق ئامادەی خۆی دەربڕیوە کە رۆژی 20-10-2024 هەڵبژاردنی پەرلەمانی کوردستان بەڕێوەببات.

جومانه‌ غه‌لای وته‌بێژی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: "کۆمسیۆن بڕیاریدا وادەی ناوتۆمارکردنی هاوپه‌یمانێتی و حزب و كاندیده‌كان بۆ هه‌ڵبژاردنی خولی شه‌شه‌می په‌رله‌مانی كوردستان تا 4-7-2024 درێژبکاتەوە".

"مەبەست لە درێژکردنەوەی وادەکە بۆ ئەوەیە کاتی زیاتر بدرێت بە حزب و لایەنەکان، بەتایبەت لە ئێستادا کە سەرۆکایەتی هەرێمی کوردستان وادەیەکی نوێی بۆ هەڵبژاردنی پەرلەمانی کوردستان دیاریکردووە"، جومانە غەلای وای وت.

بەپێی زانیارییەکانی PUKMEDIA هەتا ئێستا 4 هاوپه‌یمانێتی و 26 حزب و 101 كاندیدی سه‌ربه‌خۆ و 26  كاندیدی پێكهاته‌كان ناویان بۆ به‌شداری كردن له‌هه‌ڵبژاردنی په‌رله‌مانی كوردستان تۆمار كردوه‌، ئەمەش لەکاتێکدایە لەلایەن کۆمسیۆنەوە دوو جاری دیکە وادەی ناوتۆمارکردن بۆ هاوپەیمانێتی و حزب و کاندیدەکان درێژکراوەتەوە.

دوێنێ 26-6-2024 سەرۆکایەتی هەرێمی کوردستان مەرسومی پێنجەمی هەرێمی بۆ دیاریکردنی وادەیەکی نوێ بۆ هەڵبژاردنی خولی شەشەمی پەرلەمانی کوردستان دیاریکرد، کە رۆژی 20-10-2024 ەو کۆمسیۆنیش ئامادەیی دەربڕیوە کەلەو رۆژەدا هەڵبژاردنەکە بەڕێوەببات.

PUKMEDIA