دوو پەرلەمانتاری یەکێتی داوای دانانی یاسای سندوقی هاوکاری شێرپەنجە دەکەن

PUKMEDIA

ئەنجومەنی نوێنەران و لۆگۆی یەکێتی

دوو پەرلەمانتاری یەکێتی یاداشتێک بەمەبەستی دانانی یاسای سندوقی هاوکاری شێرپەنجە ئاڕاستەی سەرۆکایەتی ئەنجومەنی نوێنەران دەکەن، بەمەبەستی هاوکاری توشبوانی شێرپەنجە.


هەردوو پەرلەمانتاری فراکسیۆنی یەکێتی د.گەیلان قادر و کاروان یاروەیس یاداشتێکیان بە ئیمزای پەرلەمانتاران ئاراستەی سەرۆکایەتی پەرلەمانی عێراق کرد بەمەبەستی دەرکردنی یاسای سندوقی هاوکاری شێرپەنجە، لەلایەن ئەنجومەنی نوێنەرانی عیراقەوە.

لەو بارەیەشەوە کاروان یاروەیس ئەندامی فراکسیۆنی یەکێتی لە ئەنجومەنی نوێنەرانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "ئامانجمان لەم پرۆژە یاسایە، دامەزراندنی سندوقێکی تایبەتە بەهاوکاری تووشبوانی نەخۆشی شێرپەنجەو سەنتەرو نەخۆشخانەکانی تایبەت بەو نەخۆشیە کوشندەیە".

"بەهۆی زۆربونی ژمارەی توشبوان و گیانلەدەستدان بە شێرپەنجە لە عیراق بە ئیمزای پەرلەمانتاران پێشنیاری دانانی یاسای سندوقی هاوکاری شێرپەنجەمان کردووە، بۆ ئەوەی ببێتە هاوکارییەک بۆ ئەو کەسانەی کە توشبوی شێرپەنجەن"، کاروان یاروەیس وا دەڵێت.

دوو پەرلەمانتارەکەی یەکێتی لە ئەنجومەنی نوێنەرانی عیراق رۆژی 3-6-2024 بە نوسراوی رەسمی داوایان لە سەرۆکایەتی ئەنجومەنەکە کردووە کە یاسای سندوقی هاوکاری شێرپەنجە دابنرێت و بۆ ئەمەش پشتیوانی پەرلەمانتارانیان هاوپێچ بە نوسراوەکەیان کردووە.

دەقی نوسراوی دوو پەرلەمانتارەکە بەوێنە...

PUKMEDIA