زیاتر لە 37 هەزار دەنگدەری هەرێم كارتی بایۆمەتری وەردەگرنەوە

PUKMEDIA

کارتی تۆماری بایۆمەتری دەنگدەران

كۆمسیۆنی باڵای سەربەخۆی هەڵبژاردنەكانی عیراق ئاشكرایدەكات:" لە هەفتەی رابردوودا 52 هەزار و 109 كارتی بایۆمەتری دەنگدان لە عیراق دراوەتەوە بە دەنگدەران، کە 37 هەزار و 373 کارتیان لەهەرێم بووە و لەو ژمارەیەش سلێمانی لە پلەی یەكەمدایە کە 15 هەزار 758 كارتی بایۆمەتری بە دەنگدەران دراوەتەوە و كەمترینیشیان لە كەركوكە كە 216 كارتە.

کارتی نوێی بایۆمەتری دروستناکرێت

سەرچاویەك لە كۆمسیۆنی هەڵبژاردنەکانی عیراقەوە بەسایتی رەسمیی یەکێتیی نیشتمانیی کوردستان PUKMEDIA ی راگەیاند:" ئەو كارتانەی دراوەتەوە بە دەنگدەران، پێشتر نوێكراونەتەوە یاخود دەنگدەری نوێن، كارتەکانیان تەواو بووە و بۆیان گێڕدراوەتەوە".

" لە ئێستاشدا بەبۆنەی ئامادەكارییەكان بۆ هەڵبژاردنی خولی شەشەمی پەرلەمانی كوردستان هیچ كارتێكی نوێی بایۆمەتری بۆ دەنگدەران دروست ناكرێت، چ كارتی نوێ، چ نوێكردنەوە، بەوپێیەی وادەكە كۆتایی هاتووە"، سەرچاوەكە وایوت.

پرۆسەکە لە هەولێر و سلێمانی دهۆک راگیراوە

بەگوێرەی بەدواداچوونی PUKMEDIA ئەو زانیاریی و داتایانەی لە كۆمسیۆن وەرگرتووە، پرۆسەی دەكردنی كارتی نوێی و نوێكردنەوەی كارتی بایۆمەتری دەنگدان  لە پارێزگاكانی دیكەی عیراق بەردەوامە جگە لە سلێمانی و هەولێر و دهۆك و لە هەفتەی رابردوودا لە 19-تا 24/4/2024، لە پارێزگاكانی عیراق 17 هەزار و 200 كارتی نوێ تۆماركراون، بەڵام لە هەولێر و سلێمانی و دهۆك پرۆسەکە راگیراوە وهیچ كارتێك دروست نەكراوە.

نزیکەی 125 هەزار دەنگدەری نوێ تۆمارکراون

هەر بەپێی ئەو زانیارییانەی PUKMEDIA لە کۆمسیۆنی هەڵبژاردنی عیراقەوە دەستیکەتووە،لە 10-3-2024 کۆتایی بە پرۆسەی تۆماری دەنگدەران هات، بەکۆی گشتیش 124 هەزار و 667 دەنگدەر لەپرۆسەکەدا خۆیان تۆمارکردووە، لەو ژمارەیەش 42 هەزار و 14 دەنگدەر بۆ یەکەمجارە بەشداری هەڵبژاردن دەکەن کە موالیدیان 2006ە".

هاوکات لەماوەی هەفتەی رابردوودا لە هەولێر و سلێمانی و دهۆك، 37 هەزار و 373 كارتی بایۆمەتری بەو دەنگدەرانە دراوەتەوە كە پێش داخستی دەرگای تۆماركردن مامەڵەیان كردووە و لەو ژمارەیە زۆرترینیان لە سەر ئاستی هەرێم و عیراق، لە سلێمانییە كە 15 هەزار و 758 كارتە و لە هەولێر 13 هەزار و 727 كارتە و لە دهۆكیش 7888 كارتە.

10ی ئایار بانگەشەی هەڵبژاردن دەستپێدەکات

جومانه‌ غه‌لای وته‌بێژی كۆمسیۆنی باڵای هه‌ڵبژاردنه‌كانی عیراق پێشتر به‌سایتی ره‌سمیی یه‌كێتیی نیشتمانیی كوردستان PUKMEDIA ی راگه‌یاندبوو:" ئاماده‌كارییه‌كانمان بۆ ئه‌نجامدانی هه‌ڵبژاردنی داهاتووی په‌رله‌مانی كوردستان له‌و واده‌یه‌ی سه‌رۆكی هه‌رێم دیاریكردووه‌ به‌رده‌وامه‌ و بۆ ئه‌و مه‌به‌سته‌ش هه‌نگاوی باشمان بڕ‌یوه‌".

"به‌پێی بڕ‌یاره‌كانی ئه‌نجومه‌نی كۆمسیاران بانگه‌شه‌ی هه‌ڵبژاردن له‌ 10ی ئایار ده‌ستپێده‌كات و له‌ 6-6-2024 رۆژێك پێش ده‌نگدانی تایبه‌ت كۆتاییدێت، بڕ‌یاری كۆتاییش له‌باره‌ی بانگه‌شه‌وه‌ لای كۆمسیارانه‌"،جومانه‌ غه‌لای وایوت.

وته‌بێژی كۆمسیۆنی هه‌ڵبژاردنه‌كانی عیراق ئاماژه‌ی به‌وه‌شكردبوو:" به‌پێی بڕ‌یاره‌كان به‌ندكراوه‌كان و نه‌خۆش و كارمه‌ندانی ته‌ندروستی له‌هه‌رێمی كوردستان له‌رۆژی ده‌نگدانی تایبه‌تدا ده‌نگده‌ده‌ن كه‌ بنكه‌ی تایبه‌تیان بۆ دیاریكراوه‌ ".

PUKMEDIA