لیستی مووچەی مانگی نیسان رەوانەی بەغدا دەکرێت

کوردستان 06:18 PM - 2024-04-21

لیستی مووچەی مانگی نیسانی فەرمانبەران و مووچەخۆرانی هەرێمی کوردستان رەوانەی بەغداد کرا و بریارە دوای وردبینی کردنی لیستەکان تەمویلی مووچەی سەرجەم وەزارەت و دامەزراوەکانی هەرێمی کوردستان رەوانە بکرێت.

 

وەزارەتی دارایی و ئابوری حکومەتی هەرێمی کوردستان لەراگەیەنراوێکدا کە وێنەیەکی دەست PUKMEDIA کەوتووە :" ئەمڕۆ یەک شەممە ٢٠٢٤/٤/٢١، لیستی مووچەی مانگی نیسانی سەرجەم فەرمانبەران و مووچەخۆرانی هەرێمی کوردستان ڕەوانەی وەزارەتی دارایی حکومەتی فیدراڵی کراوە و بڕیارە دوای وردبینی کردنی لیستەکان تەمویلی مووچەی سەرجەم وەزارەت و دامەزراوەکانی هەرێمی کوردستان رەوانە بکرێت". 

 

ئەمەش لەکاتێکدایە، کە لە ئەمساڵدا مووچەی هەرسێ مانگی رابردوو خەرجکراوە و بە مانگی نیسانیشەوە تەواوی مووچەی مووچەخۆران خەرجدەکرێت، بەگوێرەی زانیارییەکانی PUKMEDIA بڕیارە لیستی مووچەی مانگی ئایار بە پلەبەرزکردنەوەوە رەوانەی بەغدا بکرێت و پێشتریش ئارام عه‌بدوڵڵا به‌ڕ‌ێوه‌به‌ری گشتیی بودجه‌ له‌ وه‌زاره‌تی دارایی هه‌رێمی كوردستان به‌ سایتی ره‌سمی یه‌كێتیی نیشتمانیی كوردستان PUKMEDIA ی راگه‌یاندبوو : "داوامان له‌ به‌ڕ‌ێوه‌به‌رایه‌تی ژمێریاری وه‌زاره‌ته‌كان كردوه‌ هه‌تا 1-5-2024 ئاماری پله‌به‌رزكردنه‌وه‌ی سه‌رجه‌م مووچه‌خۆرانمان بۆ بنێرن، بۆ ئه‌وه‌ی هه‌وڵبده‌ین له‌گه‌ڵ دارایی عیراقدا گفتوگۆی پله‌به‌رزكردنه‌وه‌ی مووچه‌خۆران ده‌ستپێبكه‌ین"

 

PUKMEDIA