وتەبێژی کۆمسیۆن: بۆ هەڵبژاردن ٤٥ هەزار کارمەندمان پێویستە

PUKMEDIA

جومانە غەلای وتەبێژی کۆمسیۆنی باڵای هەڵبژاردنەکانی عیراق

ئامادەکارییەکانی کۆمسیۆنی باڵای هەڵبژاردنەکانی عیراق بۆ بەڕێوەچوونی هەڵبژاردنی خولی شەشەمی پەرلەمان بەردەوامی هەیە و لەوچوارچێوەیەشدا پێویستی بە ٤٥ هەزار کارمەند بۆ بەڕێوەبردنی پرۆسەکە هەیە.

جومانە غەلای وتەبێژی کۆمسیۆنی باڵای هەڵبژاردنەکانی عیراق بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" کۆمسیۆن بۆ هەڵبژاردنی داهاتووی پەرلەمانی کوردستان پێویستی بە ٤٥ هەزار کارمەند هەیە، کە لەفەرمانبەران و دەرچووانی زانکۆ و پەیمانگاکان و خوێندکاران دەبێت".

"لەئێستادا ٨٨٦ کەس خۆیان بۆ خولی شەشەمی پەرلەمانی کوردستان کاندید کردووە، کە ٢٧٧ کەسیان لەڕەگەزی مێن و ٦٠٩ کەسیشیان لەڕەگەزی نێرن، هاوکات پێویستە سەرجەم کاندیدەکان لەلایەن ئەنجومەنی کۆمسیارانەوە پەسەند دەکرێن، جومانە غەلای وایوت.

وتەبێژی کۆمسیۆنی باڵای هەڵبژاردنەکانی عیراق ئاماژەی بەوەشکرد:" بۆ هەڵبژاردنی داهاتووی پەرلەمانی کوردستان، کۆمسیۆن هەزار و ٢٦٦ بنکەی دەنگدان، کە ٦ هەزار و ٥٤٢ وێستگە لەخۆدەگرێت و بۆ هەر وێستگەیەکیش ٤ بۆ ٥ کارمەندی پێویستە".

PUKMEDIA