سەرۆک کۆمار بۆ سەرۆکی فراکسیۆنەکان: پەلەبکرێت لەهەڵبژاردنی سەرۆکی پەرلەمان

نوسینگەی راگەیاندنی سەرۆکایەتی کۆمار

پێشوازی سەرۆک کۆمار لە ژمارەیەك سەرۆکی فراکسیۆنەکانی ئەنجومەنی نوێنەران

د.لەتیف جەمال رەشید سەرۆك کۆماری عیراق، پێشوازی لە ژمارەیەك سەرۆکی فراکسیۆنەکانی ئەنجومەنی نوێنەران کرد و دۆخی گشتی وڵات و پێشهاتەکان گفتوگۆیان لەبارەوە کرا، سەرۆک کۆمار ئاماژەی بەوەکرد، کە پێویستە پەلەبکرێت لە هەڵبژاردنی سەرۆکی نوێی ئەنجومەنی نوێنەران.

لە سەرەتای دیدارەکەدا، کە ئەمڕۆ سێشەممە 2-4-2024 لە کۆشکی سەلام لە بەغدا بەڕێوەچوو، سەرۆك کۆمار جەختیکردەوە لە گرنگی هاریکاری و هەماهەنگی نێوان هێزە سیاسییەکان لەپێناو بەردەوامبون و پتەوکردنی ئاسایش و سەقامگیری و کاری هاوبەش لە هەموو بوارەکان تا ببێتەمایەی باشترکردنی بارودۆخی سیاسی و ئەمنی و ئابوری وڵات، هەروەها ئاماژەی بە پێویستی پەلەکردن لە هەڵبژاردنی سەرۆکی نوێی ئەنجومەنی نوێنەران کرد بۆئەوەی ئەنجومەنەکە بەردەوام بێت لە کاری یاسادانان و چاودێری.

سەرۆك کۆمار دووپاتیکردەوە: "بابەتەکانی خزمەتگوزاری و باشترکردنی ئاستی بژێویی هاووڵاتیان لە پێشینەی کارەکانن، هەروەك جەختیکردەوە لە گرنگی یەکخستنی هەوڵەکانی سەرجەم  دەسەڵاتەکان و دامەزراوەکانی حکومەت بۆ پاڵپشتیکردنی پڕۆژەکانی ژێرخان و خزمەتگوزارییە بنەڕەتییەکان".

لای خۆیانەوە سەرۆکی فراکسیۆنەکانی ئەنجومەنی نوێنەران پشتیوانی خۆیان بۆ پێشنیارەکانی سەرۆك کۆمار دەربڕی سەبارەت بە گرنگی بەهێزکردنی هاریکاری نێوان سەرجەم هێزە سیاسییەکان بۆ چەسپاندنی ئاسایش و سەقامگیری و دابینکردنی پێداویستییەکانی ژیان و خزمەتگوزاری بۆ هاووڵاتیان.
PUKMEDIA