ئارێز عەبدوڵڵا: هەر رێگرییەك لە هەڵبژاردن كارێكی نایاساییە

PUKMEDIA

ئارێز عەبدوڵڵا

 ئارێز عەبدوڵڵا نووسەر و سیاسەتوان دەڵێت:" ئەمڕۆ پارتی خۆی ئەو گلەییانە دەكات، كە چەندین ساڵە حزبەكانی دیكە لە پارتییان دەكرد سەبارەت بە پرۆسەی هەڵبژاردن، لەگەڵ ئەوەشدا هەڵبژاردن كراوە و لایەنەكانیش بەشدارییان تێداكردووە، كەچی ئێستا پارتی بایكۆت دەكات".

ئارێز عەبدوڵڵا لەوتارێكیدا كە لە بیروڕای PUKMEDIA بڵاوكراوەتەوە رایدەگەیەنێت:" بەشداری نەکردنی پارتی و یەکێتیش جیاوازە، چونکە ئەو دوو هێزە ئەگەر بیانەوێ (بەداخەوە) دەتوانن رێگری لە هەڵبژاردنێکی سەرتاسەری بکەن، رێگریکردن لە هەڵبژاردن کارێکی نایاساییە، بەڵام دامودەزگا نیشتمانیەکانی هەرێم ئەو توانایەیان نییە، کە نەهێڵن رێگری بکرێ یان ئەو لایەنە سزا بدەن کە ڕێگری لە هەڵبژاردن دەکات، بەڵام بەگەڕانەوە بۆ دەستووری عیراق، دامودەزگا فیدراڵیەکان بۆیان هەیە بەهەژمونی خۆیان ئەو رێگرییە نەهێڵن".

"هەندێ لایەن فێربوون دەستی چەوری خۆیان بە سمێڵی خەڵکی تر دەسڕنەوە، هەر وێستگەیەک یان هەر سیاسەتێکیان بەدڵ نەبێ لەژێر دروشمی نەتەوەیی و نیشتمانی بەرەنگاری دەبنەوە و بابەتە سەرەکیەکەش هەر لەبیر دەبەنەوە و بڕیارەکانی ئەمدواییەی دادگای فیدراڵی لەبەرژەوەندیی پارتی نەبوون، بەڵام ئایا هەر یاسا و بڕیارێک ئەگەر لە بەرژەوەندیی پارتی نەبێت لە بەرژەوەندیی هەرێم و گەلی کوردستانیش نییە؟، بۆیە دەبێت پارتی ئەو ڕاستییە بزانێت کە مەرج نییە هەموو کات بەرژەوەندیی ئەو بریتیبێت لە بەرژەوەندیی گشتی گەل، هەمان ئەو قسەیەم بۆ یەکێتی و لایەنەکانی تریش راستە" ئارێز عەبدوڵا وادەڵێت.

بەگوێرەی مەرسومی سەرۆكی هەرێمی كوردستان رۆژی 10ی6ی ئەمساڵ هەڵبژاردن بۆ خولی شەشەمی پەرلەمانی كوردستان دەكرێت و كۆمسیۆنی باڵای سەربەخۆی هەڵبژاردنەكانی عیراق بەرێوەی دەبات.

PUKMEDIA