سەرۆککۆماری عیراق: سورین لەسەر نەهێشتنی گەندەڵی

راگەیاندنی سەرۆککۆمار

سەرۆککۆمار و باڵیۆزی ویلایەتە یەکگرتوەکانی ئەمریکا

سەرۆك کۆماری عیراق د.لەتیف جەمال رەشید لەگەڵ ئێلینا رۆمانسکی باڵیۆزی ویلایەتە یەکگرتوەکانی ئەمریکا لە عیراق کۆبوەوەو رایدەگەیەنێت: "عیراق سورە لەسەر بەردەوامیدان بە پرۆسەی چاکسازی و نەهێشتنی گەندەڵی و بونیادنانی هاوبەشیی نایاب".

لە راگەیەندراوێکی نوسینگەی رۆژنامەوانی سەرۆککۆماری عیراقدا کە کۆپییەکی بۆ وێبسایتی رەسمی یەكێتیی نیشتمانیی كوردستان PUKMEDIA نێردراوە هاتووە، لەمیانەی دیدارێکدا، کە ئەمڕۆ یەکشەممە 24-3-2024 لە کۆشکی سەلام لە بەغدا بەڕێوەچوو، سەرۆك کۆمار جەختیکردەوە لە بەردەوامیدان بە بنیاتنانی پەیوەندییەکی بەهێز، کە خزمەت بە بەرژەوەندییە هاوبەشەکان بکات و رێز لە سەروەریی نیشتمانی بگرێت و کار بۆ پەرەپێدانی هاریکاری هاوبەش لە بوارە جیاوازەکاندا، بکات.

"عیراق سورە لەسەر بەردەوامیدان بە پرۆسەی چاکسازی و نەهێشتنی گەندەڵی و بونیادنانی هاوبەشیی نایاب، کە بەشداری بکات لە بەدیهێنانی پەرەپێدانی گشتگیر و گەشەی ئابوری"، سەرۆککۆمار وای وت.

د. لەتیف رەشید ئاماژەی بەوەشکرد: "دۆزینەوەی چارەسەر بۆ کێشە هەڵپەسێردراوەکانی نێوان حکومەتی فیدراڵی و هەرێمی کوردستان، بەگوێرەی دەستور و یاسا و لێکتێگەیشتنە سیاسییەکان گرنگە"، ئاماژەی بە خواستی هەردوولاش کرد بۆ بەردەوامبون لەسەر دیالۆگ بۆ چارەسەرکردنی کێشەی بودجە و دابینکردنی شایستە داراییەکانی فەرمانبەرانی هەرێمی کوردستان هاوشێوەی فەرمانبەرانی دیکە.

PUKMEDIA