وادەی ناو تۆمارکردنی کاندیدەکان درێژکرایەوە

PUKMEDIA

لۆگۆی کۆمسیۆنی باڵای سەربەخۆی هەڵبژاردنەکانی

کۆمسیۆنی باڵای سەربەخۆی هەڵبژاردنەکانی عیراق بەردەوامە لە ئامادەکارییەکانی بۆ ئەنجامدانی هەڵبژاردنی پەرلەمانی کوردستان لە وادەی دیاریکراوی خۆیدا، هاوکات وادەی وەرگرتنی ناوی کاندیدی هاوپەیمانی و حزب و کاندیدە سەربەخۆکانی بۆ بەشداریکردن لەهەڵبژاردنی پەرلەمانی كوردستانی تا 28ی مانگ درێژكردەوە.

زیاتر لە ٦ هەزار بنکەی دەنگدان هەن

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق بە وێبسایتی رەسمیی یەکێتیی نیشتمانیی کوردستان، PUKMEDIA ی راگەیاند:" ئەنجومەنی کۆمسیاران رەزامەندی لەسەر سیستمی ژماردن و جیاکردنەوەی دەنگەکانی بەشێوەی ئەلکترۆنی و دەستیی بۆهەڵبژاردنی داهاتووی پەرلەمانی کوردستان دەربڕیوە، جگە لە پەسەندکردنی رێوشوێن بۆ کەناڵەکانی راگەیاندن بەمەبەستی رووماڵکردنی هەڵبژاردنی پەرلەمانی کوردستان".

" ئەنجومەنی کۆمسیاران بڕیاریدا بۆ هەڵبژاردنی داهاتووی پەرلەمانی کوردستان هەزار و ٢٦٦ ناوەندی دەنگدان بکاتەوە، کە دابەشدەبن بەسەر ٦ هەزار و ٥٤٢ بنکەی دەنگداندا، کە سەرجەمیان لەژێر چاودێری کامێرادان" وتەبێژی کۆمسیۆن وایوت.

جومانە غەلای ئاماژەی بەوەشکرد:" پرۆسەی دەنگدان لەبەیانی رۆژی2024-6-10 دەستپێدەکات و سەعات 6:00ی ئێوارە کۆتایی دێت و سەرجەم ئامێرەکانی دەنگدان دادەخرێن، لەهەمانکاتدا کۆپی شریتی ئەنجامە سەرەتاییەکان دەگەیەنرێتە بریکاری قەوارە سیاسییەکان و دواتر ئەنجامەکان بەشێوەی ئەلکترۆنی دەنێردرێن بۆ فەرمانگەی نیشتمانی و پاشان پرۆسەی ژماردن و جیاکردنەوەی دەستی لە بنکەکانی دەنگدان دەستپێدەکات".

وادەی ناو تۆماركردنی کاندیدەکان درێژکرایەوە

" كۆمسیۆنی هەڵبژاردنەكانی عیراق وادەی وەرگرتنی ناوی کاندیدی هاوپەیمانی و حزب و کاندیدە سەربەخۆکانی بۆ بەشداریکردن لەهەڵبژاردنی پەرلەمانی كوردستان تا 28ی مانگ درێژكردەوە و هاوکات رێکارەکانی تایبەت بە پێدانی ژمارەی بە  لیست و کاندیدە سەربەخۆکانی بۆ بەشداریکردن لە ھەڵبژاردنی پەرلەمانی کوردستان پەسەندکردو بڕیاریدا رۆژی ٢٧ی ئادار لە ھەولێر پرۆسەکە ئەنجام بدرێت، کە پێدانی ژمارە بە هاوپەیمانی و لیست و کاندیدە سەربەخۆکان لە ژمارەی ١٠١ و بەرەو سەرەوە دەستپێدەکات و پرۆسەکەش بەئامادەبوونی نوێنەرانی سەرجەم حزب و کاندیدە سەربەخۆکان بەڕێوەدەچێت و " جومانە عەلای وایوت.

وتەبێژی کۆمیسیۆن ئاماژەی بەوەشکرد:"لیژنەیەکی فەرمانگەی ھەڵبژاردنی کۆمسیۆن راستەوخۆ سەرپەرشتی ئەو پرۆسەیە دەکات و دواتریش ئەنجومەنی کۆمسیاران دەرئەنجامی کاری لیژنەکە پەسەند دەکات".