دادگای فیدراڵی: پەلە بکرێت لە بەئەلیکترۆنیکردنی مووچەی فەرمانبەرانی ھەرێم

PUKMEDIA

دادگای فیدراڵی

دادگای باڵای فیدراڵی عیراق رایگەیاندووە، بە ئەلیکترۆنیکردنی مووچەی فەرمانبەرانی ھەرێم پێویستی بە کاتە و ئەرکی حکومەتی ھەرێمە ھەماھەنگی لەگەڵ وەزارەتی دارایی عێراق بکات، سەرۆکی فراکسیۆنی یەکێتیش لە ئەنجومەنی نوێنەران دەڵێت: "بڕیارەكەی دادگای فیدراڵی بۆ ئەوەیە كە مووچەی فەرمانبەرانی هەرێم لە ململانێ سیاسییەكان دووربخرێتەوە".

پێویستە حکومەتی هەرێم هەماهەنگی لەگەڵ عیراق بکات

دادگای فیدراڵی عیراق لە روونکردنەوەیەکدا رایگەیاندووە: "بە ئەلیکترۆنیکردنی مووچەی فەرمانبەرانی ھەرێم پێویستی بە کاتە و ئەرکی حکومەتی ھەرێمە ھەماھەنگی لەگەڵ وەزارەتی دارایی عێراق بکات، هەروەها ئامانج لە بڕیارەکەی دادگای فیدراڵی گەرەنتیکردنی مافی موچەخۆرانی ھەرێم و بەدیھێنانی دادپەروەرییە".

"ئەو پڕۆسەیە پێویستی بە کاتە و پێویستە ھەردوو وەزارەتی دارایی عیراق و ھەرێم پەلە بکەن لە تەواوکردنی ئەو پڕۆسەیە، دەبێت مووچەی ئەو فەرمانبەرانەش بە کاش خەرج بکرێت کە بە ئەلیکترۆنیکردنی مووچەکانیان بۆ مانگی ئادار بەھۆکاری تەکنیکی کۆتای نایەت "، لە راگەیەندراوەکەی دادگای فیدراڵیدا هاتووە.

مووچەی فەرمانبەرانی هەرێم لە ململانێ سیاسییەکان دووربخرێتەوە

هەرێم كەمال ئاغا سەرۆكی فراكسیۆنی یەكێتی لە ئەنجومەنی نوێنەرانی عیراق بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: "بڕیارەكانی دادگای فیدراڵی یەكلاكەرەوەن، بەڵام  پێویستە حكومەتی هەرێم و عیراق پەیوەست بن  وهاوكاریی و ئاسانكاری بۆ جێبەجێكردنی بكەن بۆ ئەوەی فەرمانبەرانی هەرێم نەبنە قوربانی".

"بڕیارەكەی دادگای فیدراڵی بۆ ئەوەیە كە مووچەی فەرمانبەرانی هەرێم لە ململانێ سیاسییەكان دووربخرێتەوە و بە نیشتمانی بكرێن و چارەسەرێكی بنەڕەتیشە بۆ ئەو كێشەیە"، سەرۆكی فراكسیۆنی یەكێتی لە نوێنەران وادەڵێت.

دادگای فیدراڵی عیراق پێشتر بڕیاریدا کە بەبێ هەژماری بانکی، وەزارەتی دارایی عیراق هیچ بڕە پارەیەک بۆ مووچەی فەرمانبەرانی حکومەتی هەرێم بۆ مانگی ئادار نەنێرێت.
PUKMEDIA