وته‌بێژی كۆمسیۆن: نوێنه‌رمان له‌لیژنه‌ی ئه‌منی هه‌ڵبژاردن ده‌بێت

PUKMEDIA

پڕۆسەی دەنگدان

وه‌زاره‌تی ناوخۆی حكومه‌تی هه‌رێمی كوردستان لیژنه‌یه‌كی باڵای ئه‌منی بۆ به‌ڕێوه‌چوونی هه‌ڵبژاردن و پارێزگاری له‌سندوقه‌كانی ده‌نگدان و پاراستنی ده‌نگده‌ر و بنكه‌كانی ده‌نگدان پێكده‌هێنێت و وته‌بێژی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق رایده‌گه‌یه‌نێت: "نوێنه‌رمان له‌لیژنه‌كه‌دا ده‌بێت".

لیژنه‌كه‌ پارێزگاری له‌ده‌نگ و ده‌نگده‌ر ده‌كات

جومانه‌ غه‌لای وته‌بێژی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: "به‌ بڕ‌یاری وه‌زاره‌تی ناوخۆی حكومه‌تی هه‌رێمی كوردستان، لیژنه‌یه‌كی باڵای ئه‌منی بۆ هه‌ڵبژاردنی په‌رله‌مانی كوردستان پێكهێندراوه‌و دادوه‌ر عامر مووسا حوسه‌ینی نوێنه‌رایه‌تیی كۆمیسیۆنی عیراق له‌لیژنه‌كه‌دا ده‌كات".

"ئه‌ركی لیژنه‌كه‌ پاراستنی ئاسایش و سه‌ربه‌خۆیی پڕ‌ۆسه‌ی هه‌ڵبژاردنی په‌رله‌مانی كوردستانه‌، هاوكات پاراستنی ده‌نگده‌ر و بنكه‌كانی ده‌نگدان و كۆگاو كه‌ره‌سته‌و كه‌لوپه‌له‌كانی تایبه‌ت به‌پڕ‌ۆسه‌ی ده‌نگدان و گواستنه‌وه‌ی سندوقه‌كانی ده‌نگدانه‌ بۆ ناوه‌ندی هه‌ڵبژاردنی پارێزگاكان"، وته‌بێژی كۆمسیۆن واده‌ڵێت.

یه‌ك رۆژ كات ماوه‌

ته‌نها یه‌ك رۆژ له‌به‌رده‌م ئه‌و كه‌سانه‌دا ماوه‌ كه‌ تائێستا ناوی خۆیان له‌تۆماری ده‌نگدانی كۆمسیۆنی عیراق تۆمارنه‌كردوه‌و له‌دوای ئه‌و واده‌یه‌ ئه‌گه‌ر درێژنه‌كرێته‌وه‌ مافی ده‌نگدانی نابێت.

وته‌بێژی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق ئه‌وه‌شیخسته‌ڕوو: "پڕ‌ۆسه‌ی تۆماركردن و نوێكردنه‌وه‌ی تۆماری ده‌نگدان تاوه‌كو سبه‌ی (10ـی ئاداری 2024) به‌رده‌وامه‌و هاووڵاتیان ده‌توانن سه‌ردانی نزیكترین ناوه‌ندی كۆمیسیۆن بكه‌ن بۆ تۆماركردنی زانیارییه‌كانیان و دواتریش كارتی ده‌نگدانیان بۆ ده‌رده‌هێندرێت".

نزیكه‌ی چوار ملیۆن ده‌نگده‌ر له‌هه‌رێم هه‌ن

له‌دوو مانگی رابردوودا زیاتر له‌ 109 هه‌زار كه‌سیش بۆ یه‌كه‌مجار داوای كارتی بایۆمه‌تری ده‌نگدانیان كردووه‌.

به‌پێی زانیارییه‌كانی سایتی ره‌سمی یه‌كێتیی نیشتمانیی كوردستان PUKMEDIA، بۆ هه‌ڵبژاردنی خولی شه‌شه‌می په‌رله‌مانی كوردستان، 3 ملیۆن و 789 هه‌زار و 360 ده‌نگده‌ر هه‌ن و له‌و ژماره‌یه‌ش تائێستا زیاتر له‌ 2 ملیۆن 800 هه‌زار ده‌نگده‌ر كارتی بایۆمه‌ترییان بۆ كراوه‌.

بڕ‌‌یاره‌ هه‌ڵبژاردنی خولی شه‌شه‌می په‌رله‌مانی كوردستان له‌ رۆژی 10-6-2024، بۆ 100 كورسی به‌چوار بازنه‌ به‌ڕ‌‌ێوه‌بچیت، كه‌ كورسییه‌كان به‌م شێوه‌یه‌ دابه‌شبوون، پارێزگای سلێمانی 38 كورسی، پارێزگای هه‌ولێر 34 كورسی، پارێزگای دهۆك 25 كورسی، پارێزگای هه‌ڵه‌بجه‌ 3 كورسی.
PUKMEDIA