سەرۆككۆماری عیراق مەرسومی بۆ دەستبەكاربوونی 12 پارێزگار دەركرد

نووسینگەی راگەیاندنی سەرۆکایەتی کۆمار

سەرۆککۆمار

د. لەتیف رەشید سەرۆككۆماری عیراق مەرسومی كۆماریی بۆ دامەزراندنی 12 پارێزگاری عیراق دەركرد، كە لە لایەن ئەنجومەنی پارێزگاکانیانەوە هەڵبژێردراون، بەڵام هێشتا پارێزگار بۆ كەركوك و دیالە هەڵنەبژێردراوە و پارێزگاری سەڵاحەدین مەرسومی كۆماری بۆ دەرنەچووە.

 بەگوێرەی راگەیەندراوێكی نوسینگەی رۆژنامەنووسی سەرۆكایەتی كۆمار كە وێنەیەكی بۆ PUKMEDIA نێردراوە، رۆژی 13/2/2024 سەرۆككۆماری عیراق مەرسومی بۆ پارێزگاری نوێی بەغدا، بەسرە، نەینەوا، بابل، كەربەلا، واست، زیقار، نەجەف، ئەنبار، موسەننا، میسان و دیوانییە دەركرد و  لە رۆژی دەرچوونی مەراسیمەکەوە دەستبەكار دەبن.

بەگوێرەی بەدواداچوونی PUKMEDIA، پارێزگاری سەڵاحەدین لەلایەن ئەنجومەنەوە هەڵبژێردراوە بەڵام مەرسومی كۆماری ماوە بۆ دەستبەكاربوونی، بەڵام ئەنجومەنی پارێزگاكانی كەركوك و دیالە پارێزگاریان هەڵنەبژاردووە و هەركاتێك پرۆسەی هەڵبژاردنی پارێزگار لە ئەنجومەن بەڕێوەچوو، ئەوانیش مەرسومی كۆمارییان بۆ دەردەكرێت.

هەڵبژاردنی ئەنجوومەنی پارێزگاكانی عیراق لە رۆژی 18/12/2023، بەڕێوەچوو، كۆمیسیۆنی باڵای سەربەخۆی هەڵبژاردنەكانی عیراقیش لە رۆژی 21/ 1/ 2024 ئەنجامی كۆتایی هەڵبژاردنەكەی پەسندكر و بەرەسمی رایگەیاند.
PUKMEDIA