‎قوباد تاڵەبانی و وەزیری بەرگری توركیا پرسی فڕۆكەخانەی سلێمانی تاوتوێدەكەن

نووسینگەی قوباد تاڵەبانی

كۆبوونەوەی قوباد تاڵەبانی و وەزیری بەرگریی توركیا

قوباد تاڵەبانی، جێگری سەرۆك وەزیران لەگەڵ یاشار گولەر، وەزیری بەرگریی توركیا كۆبووەوە و پێكەوە پرسی فڕۆكەخانەی نێودەوڵەتیی سلێمانی و چەند بابەتێكی دیكەی جێی بایەخی هەردوولایان تاوتوێ كرد.

لە كۆبوونەوەكەدا، كە ئێوارەی ئەمڕۆ (چوارشەمە،  ٧ی شوبات)، لە هەولێر بەڕێوەچوو،  وەزیرانی پێشمەرگە و پلاندانان و جێگری لێپرسراوی فەرمانگەی پەیوەندییەكانی دەرەوە و باڵیۆزی توركیا لە عێراق ئامادەی بوون، پەیوەندییەكانی توركیا لەگەڵ هەرێمی كوردستان و پتەوكردنی ئەو پەیوەندییانە بە شێوازێك كە خزمەتی زیاتر بە هەردوولا بكات خرانە بەرباس.

دۆسیەی ئەمنی و دۆخی سەقامگیری عێراق و هەرێمی كوردستان تەوەرێكی تری كۆبوونەوەكە بوو، لەوبارەیەوە بیروڕا ئاڵوگۆڕ كرا و  جەخت كرایەوە لەسەر گرنگی پاراستنی سەقامگیری و رێزگرتن لە سەروەریی خاكی هەردوو وڵات.

هەر لە كۆبوونەوەكەدا باسی پرسی داخستنی ئاسمانی توركیا بەڕووی فڕۆكەخانەی نێودەوڵەتی سلێمانی كراو لەمبارەیەوە جێگری سەرۆك وەزیران داوای چارەسەركردنی ئەو كێشەیەی كرد.

PUKMEDIA