سه‌رۆك كۆمار: رێگه‌ناده‌ین عیراق بكرێته‌ سه‌رچاوه‌ی هه‌ڕ‌ه‌شه‌ بۆ وڵاتان

PUKMEDIA

کۆبونەوەی سەرۆککۆمار لەگەڵ وەفدێکی تورکیا

د.له‌تیف جه‌مال ره‌شید سه‌رۆك كۆماری عیراق پێشوازیكرد له‌ یه‌شار گوله‌ر وه‌زیری به‌رگریی توركیا و وه‌فدی یاوه‌ری، كه‌ فه‌ریق روكن سه‌عد مه‌زهه‌ر عه‌للاق یاریده‌ده‌ری سه‌رۆكی ئه‌ركانی سوپا ئاماده‌یی بوو، جه‌ختیشی كرده‌وه‌ "كه‌ قه‌یرانه‌كان له‌ڕ‌ێگای دیالۆگه‌وه‌ چاره‌سه‌ر بكرێن نه‌ك به‌پێشێلكردنی سه‌روه‌ریی ده‌وڵه‌تان و زیانگه‌یاندن به‌ هاووڵاتیانیان".

سه‌رۆك كۆمار: كێشه‌كان به‌دیالۆگ چاره‌سه‌ر بكرێن

له‌میانی دیداره‌كه‌دا، سه‌رۆك كۆمار جه‌ختیكرده‌وه‌:"پێویسته‌ چاره‌سه‌ركردنی كێشه‌كانی په‌یوه‌ست به‌ سنور و دۆسییه‌ی ئه‌منیی نێوان هه‌ردوو وڵات له‌ڕ‌ێگه‌ی هاریكاری و راوێژ و هه‌ماهه‌نگی هاوبه‌ش و پێكهێنانی لیژنه‌ی ئه‌منی له‌نێوان هه‌ردوولا بێت بۆ ده‌ستنیشانكردنی كێشه‌كان و دانانی چاره‌سه‌ری پێویست بۆیان و ره‌تكردنه‌وه‌ی بڕ‌یاری تاكلایه‌نه‌ له‌چاره‌سه‌ركردنی كێشه‌ هه‌ڵپه‌سێردراوه‌كان و نابێت خاكی عیراقیش بكرێته‌ سه‌رچاوه‌ی هه‌ڕ‌ه‌شه‌كردن له‌سه‌ر وڵاتانی دراوسێ یان ئه‌وانی دیكه‌".

ئاماژه‌ی بۆ ئه‌وه‌شكرد:" پێویسته‌ رێز له‌ سه‌روه‌ریی عیراق بگیرێت و ئه‌و پێشێلكارییه‌ سه‌ربازیانه‌ی ده‌كرێنه‌ سه‌ر خاكی عیراق له‌نێویاندا شاره‌كانی هه‌رێم راگیرێت، هه‌روه‌ها چاره‌سه‌ركردنی كێشه‌ هه‌ڵپه‌سێردراوه‌كانی نێوان هه‌ردوولا له‌ڕ‌ێگه‌ی گفتوگۆ و به‌رده‌وامیدان به‌كۆبوونه‌وه‌كان بێت".


هه‌روه‌ها د.له‌تیف جه‌مال ره‌شید باسی دۆسییه‌ی ئاو كردو جه‌ختیكرده‌وه‌:" له‌سه‌ر پێویستی چاره‌سه‌ركردنی دۆسییه‌ی ئاو له‌ڕ‌ووی ته‌كنیكی و ده‌سته‌به‌ركردنی پشكێكی دادپه‌روه‌رانه‌ بۆ عیراق بۆ دابینكردنی پێداویستییه‌كان و چالاككردنی كاری لیژنه‌ هاوبه‌شه‌كان و سوودوه‌رگرتن له‌شاره‌زایی له‌ به‌ڕ‌ێوه‌بردنی دۆسییه‌كانی ئاودا".

سه‌رۆك كۆمار ئاماژه‌ی به‌ چه‌ندین رێوشوێنی توركیا كرد كه‌ گه‌شته‌ ئاسمانییه‌كانی نێوان فڕ‌ۆكه‌خانه‌ی سلێمانی و شاره‌كانی توركیای راگرتووه‌، كه‌ ده‌بێته‌ هۆی تێكدانی هاریكاری هاوبه‌ش و رێگری له‌ پاراستنی په‌یوه‌ندییه‌ كۆمه‌ڵایه‌تییه‌كانی نێوان هه‌ردوو گه‌ل ده‌كات.

وه‌زیری به‌رگری توركیا: پشتیوانی عیراق ده‌كه‌ین

لای خۆشییه‌وه‌ یه‌شار گوله‌ر وه‌زیری به‌رگریی توركیا پاڵپشتی وڵاته‌كه‌ی بۆ ئاسایش و سه‌قامگیری و سه‌روه‌ری عیراق نیشانداو ویستی پته‌وكردنی په‌یوه‌ندییه‌كانی هاوكاری و هه‌ماهه‌نگی هاوبه‌شه‌ له‌بواره‌ جیاجیاكاندا به‌ شێوه‌یه‌ك كه‌ به‌رژه‌وه‌ندی هاوبه‌ش به‌دیبهێنێت بۆ هه‌ر دوو گه‌لی دۆست.

هه‌روه‌ها وه‌زیری به‌رگریی توركیا ویستی خۆی نیشاندا بۆ دۆزینه‌وه‌ی ڕ‌ێگه‌چاره‌یه‌ك بۆ ده‌ستپێكردنه‌وه‌ی گه‌شته‌كانی نێوان سلێمانی و شاره‌كانی توركیا.

 به‌بۆنه‌ی یه‌كه‌مین ساڵیادی بوومه‌له‌رزه‌كه‌ی توركیاشه‌وه‌، وه‌زیری به‌رگری توركیا هه‌ڵوێستی عیراقی له‌دابینكردنی هاوكاری بۆ گه‌لی توركیاش به‌رزنرخاندو جه‌ختی كرده‌وه‌ كه‌ وڵاته‌كه‌ی پاڵپشتی چه‌سپاندنی ئاسایش و ئارامی و چاره‌سه‌ركردنی هه‌موو كێشه‌كان ده‌كات.

PUKMEDIA